影壇新貴施嘉莉祖安遜（ScarlettJohansson），前日同佢嘅偶像前輩尊特拉華達（JohnTravolta）一齊出席新片《ALoveSongforBobbyLong》喺洛杉磯舉行嘅首映禮，當日施嘉莉已經知道自己憑呢套戲第三度提名金球獎劇情片組別「最佳女主角」，難怪佢神采飛揚。
施嘉莉上年憑《迷失東京》同《畫意私情》獲兩項金球獎「最佳女主角」提名，今年佢又再次憑同肥尊合作嘅新片角逐影后，施嘉莉話：「我仍然感覺好新鮮，完全覺得意外！我能夠獲得提名，對呢部片非常重要。」
不過施嘉莉亦為拍檔肥尊抱不平，佢話：「其實呢部片係尊特拉華達演出最精采嘅一次，佢係一位出色嘅演員，但啲人成日都冇將佢睇成為一個認真嘅劇情片演員，佢今次未能提名最佳男主角，我都感到有啲失望。」
講開又講，同男星積烈特里圖（JaredLeto）拍緊拖嘅施嘉莉，最近盛傳搭上瑪麗嘉兒（MariahCarey）嘅棒球手前男友DerekJeter，佢哋上星期被人目睹喺間餐廳撐枱腳，之後重好似一齊過夜㖭，不過施嘉莉嘅發言人就否認有咁嘅事。