前日睇《蘋果》副刊，左丁山話領匯（2382）單官司強弱懸殊，房委會係「車路士」，「公屋居民」係「查爾頓」。
結果真係「車路士」打贏，不過唔算好清脆，如果唔係「公屋居民」申請唔到法援，相信一定會死纏爛打。事實上，噚日房委會雖勝出，亦唔敢拍心口話領匯星期四一定上到市。
噚日美商會表示，今次領匯事件唔會影響國際投資者信心，但趙飛雲就覺得好似唔太熟嘅美國朋友對你講，得閒去佢屋企坐吓。香港社會愈來愈分化，政治風險暗暗地上升，長遠而言，又點會唔影響投資市場？
作為普通散戶，只能抱着今朝有酒今朝醉的心態，有得炒時盡量炒，有得賺時盡量賺，唔理得以後咁多。有市場人士預期，領匯上市初期，股價料有10-20%升幅，如果趙飛雲有貨，有理冇理都賺咗先。
上周港股大跌逾300點，唔少人都轉為睇淡，但恒指昨日大升157點，重返萬四關之上企穩，如果今日進一步重返10日線（現處14099）之上收市，可能又係另一個故事。
港股今年還有十多個交易日，高位在後頭的機會仍然存在，但在這個水平入市，當然不宜搏命，只宜小注趁高興。
趙飛雲見新地（016）升破短期降軌，在0.48元買入20萬份新地Call輪2252，隻輪收0.50元，較上日升11%。正股78元阻力頗大，若升得破，早前高位80.75元相信可突破，Call輪2252自然海闊天空，但亦要提防未能衝破引發回吐，所以玩2252轉身要快，一擊不中就走。
趙飛雲