何超瓊前晚出席翡翠首飾設計比賽，提到賭王父親何鴻燊早前生日誤傳死訊，超瓊表示與胞妹夾份送了一個玉壽桃給父親，因為翡翠多戴會有人氣，又可以擋煞。
名模Mikki和JessieLeong等，前晚在灣仔君悅酒店為「國際時尚翡翠首飾設計大賽」頒獎禮擔任示範模特兒，示範三十件入圍作品。
評判團成員顧紀筠戴上黑、白珍珠頸鏈，沒有配合大會主題戴翡翠，她說：「因為上次Pansy（指何超瓊）戴好多靚翡翠，我諗至少都要過百萬，相比之下，我啲嘢真係太唔見得人，咪改戴大溪地珍珠囉！」
對於顧紀筠改戴其他首飾，以免與超瓊正面交鋒，超瓊說：「我嗰啲都唔係乜嘢特別嘢，最靚係嚿玉，不過𠵱家已經買唔到，我媽咪亦唔鍾意玉，所以都冇乜玉器留畀我。」她又表示最想買一對翠玉碗豆，取其「豐滿幸福」之意。
賭王何鴻燊早前生日卻誤傳死訊，問超瓊可有送玉器予父親定驚，她說：「佢大把玉啦，佢係買成座玉山，好大件嗰啲，我就冇資格買，不過我哋幾姐妹早排夾份送咗個玉壽桃畀爹哋做生日禮物，翡翠多戴會有人氣，又可以擋煞。」
此外，顧紀筠表示非常欣賞得獎作品，卻無意購買，她說：「通常買夠鑽石先會買翡翠，其實今次作品真係好靚，Pansy可以買得起，人哋富戶，若果係我，就要講價講到牙血都流埋先得囉！」她透露只得四、五件翡翠收藏，三件來自亡母，故絕不會轉賣。
採訪：RitaLeung
攝影：ChenWaiOn
