周日受到「詐彈」恐嚇而腰斬嘅皇馬主場對皇蘇賽事，餘波未了。但朗拿度及施丹無懼恐嚇，為善最樂，周二照踢慈善賽。
朗拿度同施丹周一繼續呼籲馬德里市球迷，喺佢兩位有份做搞手，於周二晚巴拿比奴球場進行嘅「對抗貧窮」慈善賽，多多入場做善事。我求大俠希望一切順利，班「兇徒」畀畀面咪再搞事嘞。
另一方面，賽會已決定稍後「雙皇」要繼續踢埋剩番嘅七分鐘比賽，但原來皇蘇由所在地去到馬德里，成七百公里遠，都幾無謂。不過如果俾佢哋成功喺呢七分鐘入面入波贏埋，喺某博彩公司開個十五倍Ｗ出嚟都幾盞，睇你夠唔夠膽博皇蘇贏！最後都係和波？得一點二二倍咋！
好多人都有偏頭痛，效力阿仙奴嘅瑞典中場龍格保亦唔例外，而且重因為咁錯過之前對打和車路士二比二嘅英超大戰。聽講佢嘅病情都幾嚴重，痛到練唔到波，幾可肯定踢唔到禮拜日對樸茨茅夫場英超聯，阿仙奴更安排佢進行腦掃描。我求大俠希望佢可以快啲好番返球場。
我求大俠記得阿根廷中場施蒙尼曾經講過，希望喺馬體會踢到收山。唔知佢最近係咪見自己冇乜上陣機會，腳痕起上嚟又決定走人，最近突然返番去阿根廷踢競賽會。聽競賽會主席馬連講，原來施蒙尼細細個已經成日跟老竇入場睇競賽會比賽，原來童年情意結，唔怪得啦！
喺今年年頭加盟漢諾威嘅美國中前場球員馬泰斯，初時係威係勢，頭五場入四球，但隊波轉由連倫執教後即不受重用，故會喺下個月返大都會星隊。但有出自然有入，當奴雲下月會喺聖荷西地震返利華古遜，即管睇吓呢位兩屆美國足球先生得主可唔可以幫美國球員爭口氣啦！
美國網球手盧迪克近日喺未有提供任何理由嘅情況下，炒咗教練基拔。呢個決定當然令曾經協助名將阿加斯事業起飛嘅基拔訝異；因為喺佢指導下，盧迪克上年年中開始大躍進，贏咗包括美國公開賽在內嘅五項錦標，𠵱家學晒嘢就唔要人，呢位後生仔唔通打完齋就唔要和尚囉。