恒基總部由中環環球大廈搬去國金中心二期，今日傍晚舉行慶祝酒會。
大發展商搬新總部，恒基應該係近年第一單，何況國金二期重係地標，更加矚目。
恒基業務多元化，主席四叔李兆基，身家排富豪榜頭幾位，肯定有唔少官商猛人畀面到賀。
咁高興嘅日子，佢老人家好識做，安排時段畀傳媒採訪，唔知到時會唔會順便講吓西九呢？
國金二期，一直對個市道構成沉重壓力，點知入伙後，經濟好轉，出租加快，𠵱家得番小量供應，呎租重變成市場指標。
四叔一搬總部，甲級商廈造價突然飛升，睇嚟國金二期風水，真係好利恒基喎。
財經雜誌《亞洲貨幣》評選新鴻基地產為今年「亞洲管理最佳公司」，以及「香港企業管治最佳公司」第一位。
新地副主席郭炳聯好開心。佢話，感謝一百九十二名受訪分析員與基金經理，對新地嘅支持。
新地早排因為有意拆卸紅磡居屋紅灣半島，被環保團體高調表明，會提名佢做香港「天冇眼企業」，最後決定唔拆，攞番好多民意分，對公司嘅形象好有幫助。
樓市好，代理行生意愈做愈大，港置胡日發話，公司準備擴充寫字樓，明年會請多三十個後勤。
因業務會多元化，𠵱家用嚟做會議室嘅地方，會打通做埋寫字樓，噚日係會議室最後一次用嚟開記者會。
港置租埋樓下二千呎樓面，用嚟做會議室兼培訓課室，比起𠵱家嗰個，足足大一倍。
胡日發話，會繼續擴充，需要更多地方，明年隔籬間公司約滿，打算租埋嚟用。
馬會近年大歎收入減少，但賽馬話晒都係上流社會活動之一，所以時不時見到有公司贊助盃賽，租包廂招待商業客戶，同埋朋友，夠面子之餘又夠威，重可以有廣告宣傳之效。
百仕達今個禮拜六，贊助沙田賽馬日「上善．名駿──百仕達．紅樹西岸盃」，當日邀請嘉賓與傳媒睇呢場盃賽，管理層又會介紹集團深圳樓盤紅樹西岸進度。
講開深圳紅樹西岸，本月二十五號前，發展商喺樓盤舉辦畢加索名畫展，共展出二百幾幅名畫，夠晒諗頭。
普天同慶嘅聖誕節就快到，為增添節日氣氛，發展商通常都好識做，喺售樓處安排眾多應節節目及表演助興。
好似九龍倉，今個聖誕節與新年假期，喺深井碧堤半島售樓處，安排一連串節目，包括各式舞蹈表演，例如爵士舞、芭蕾舞等等。
當然，離唔開有聖誕老人同埋聖誕女郎助陣，增添歡樂氣氛。
經濟好轉，聖誕又係一大消費檔期，發展商將售樓處布置得充滿節日氣氛，話唔定市民會買番個單位當聖誕禮物。
九龍倉助理董事黃光耀話，由即日起至到下個月二號，尖沙嘴擎天半島同埋碧堤半島買家，均可獲得購物現金券優惠，兩房單位送十萬、三房二十萬、四房三十萬，優惠總值五百萬。
公司禮拜六，加推六個碧堤半島六十樓以上高層單位，平均呎價四千八百六十八，最平賣三百一十四萬。
電郵地址：
