近排升到你唔信的奧瑪仕（959），噚日終於上演一幕高開低收，早市奧瑪仕一度高見2.225元，但臨尾市急急回軟，結果倒跌8.29％，收1.77元。隻股波幅大成咁，真係心血少啲都唔掂。
近幾日濠江賭業股再度生猛，好大程度係因為奧瑪士炒得夠勁，所以隻股噚日一度跌到冇晒買盤支持時，小初好擔心其他濠賭股會受到牽連。
不過經紀陳話，江湖傳聞奧瑪仕繼上周五帶證券界到濠江一遊後，重會有其他動作，箇中目的唔排除係為批股集資鋪路，加上奧瑪仕剛入股的希臘神話賭場開幕在即，未有咁快炒完啩？
奧瑪仕噚日成交量好誇張，有成1.5億股，金額3.13億元。
另外，搞緊供股的中華城市燃氣（603），隻「威士」剛剛除牌，正股即刻升返11.77％，收1.9仙。
經紀陳話，接納供股最後限期係星期四，呢段時間唔衝刺做好股價，容乜易股東唔肯參與？
慕容小初