澳門鏵下周一濠江慶祝回歸五周年以及舉行第二屆政府領導層就職典禮，胡主席好畀面出席，老董亦乘機去埋述職，費事上京咁麻煩，反正都冇乜新嘢要滙報，阿爺亦對香港一舉一動瞭如指掌，唔使多講。
胡主席駕到，香港各路人馬自然會想攔途請願兼抗議，八方問已貴為立法會議員嘅長毛梁國雄，有冇收到鏵哥請柬，佢話到𠵱家都冇，不過，有冇請柬佢都會去，因為呢個係佢參選嘅承諾，加上北京最近又拉民主人士，佢更加要去抗議，求胡主席盡快放人；而平反六四，還政於民以及盡快畀港澳進行雙普選，都係必定會叫嘅口號。八方擔心長毛此行未必順利，因為澳門一定大為緊張。
長毛都係公屋居民，佢話要為大班講句公道話，因為就算大班唔幫班小市民入稟告領匯，佢都會告，佢哋咁做都係依法辦事，據理力爭，有乜問題呢？
傳真︰2623-9278
電郵︰