最近影音產品嘅潮流，都好似圍住HD兩字，而呢期「HD」產品中風頭躉，首推SONYHDR-FX1，因為佢真係拍到1080i，有如HDTV電視廣播級的完美影像；問10個發燒友，9個半都話佢畫質正，但叫到佢哋畀錢買，個個又耍手擰頭！點解？正如SONY在日本發布會上所述，HDR-FX1如果真係行1080i作拍攝，一係你就將部HDR-FX1直插顯示屏輸出，再唔係就放入電腦HardDisk作播放，播放介面唔普及，絕對係令一般玩家卻步原因。
不過最近香港SONY又公布，佢哋將會推出HDV錄影機──HVR-M10，情況可能有所改觀，HDV-M10係一部輕巧型1080iHDV錄影機，可以作1080i之影像剪輯及播放。驟眼睇佢好似淨係益到班Pro玩家，不過大家須知SONY向來喜歡玩「獨家制式」，「1080iHDV錄影機」一詞一出，相信「民用版」錄、播專機，已經指日可待！口痕友可能又會重提Betacam故事、唔普及、電視台專用！不過大家需留意，今次SONY亦好聰明，影帶是使用了市場相當成熟的MiniDV帶，影像制式則是世界普遍的HDTV廣播格式，「平」加「普及」，相信贏面已相當大，等的只是時機，再等多啲地方好似日本咁作HDTV廣播，潛藏Martket無可估量。
文：DIGIMAN
《吹吹IT風》以討論及分析熱門IT話題為主，由電腦、數碼相機、手機、AV產品到TVGames，都屬討論範圍，歡迎讀者提出改善建議、討論話題、疑難雜症，谷氣投訴甚至自薦發表文章都得，總之大家多多交流。
[email protected]