NBA兩位球星拜恩同馬龍嘅爭執續有餘波，原來拜恩嬲咗呢位上季同佢稱兄道弟嘅前湖人隊友，係衝冠一怒為紅顏；拜恩話馬龍喺兩嗰禮拜前出言調戲佢老婆雲妮莎，講咗啲令佢老婆極之反感嘅說話，所以先同馬龍反面。拜恩周日接受傳媒訪問時解釋同馬龍嘅私人恩怨，佢話：「之前我哋兩家人成日聚會，一齊玩，甚至互相照顧對方嘅孩子。事後我有打電話質問馬龍，叫佢離我老婆遠啲。」
拜恩重話馬龍冇否認自己有講過呢番說話，重向佢道歉。但馬龍嘅經理人曼尼表示佢當事人從未調戲過雲妮莎，馬龍聽到呢啲指控都好奇怪。
雖然拜恩話如果馬龍重返湖人，佢會將私人恩怨撇開，但就只會以隊友身份歡迎佢，朋友當然冇得做。拜恩講到咁白，事情又鬧到咁僵，我求大俠可以肯定馬龍一定唔會再返湖人嘞！
見報時大家應知道今屆歐洲足球先生獎項誰屬，我求大俠寫呢段稿時，歐洲傳媒講到AC米蘭前鋒舒夫真高攞硬獎咁，而舒夫真高前日贏費倫天拿後，亦話噚日禮拜一係佢大日子，即係放風畀人知坐定粒六。舊年個獎係宿敵祖雲達斯嘅尼維特攞，舒夫真高擺明想幫球會攞彩。
早排祖雲達斯教練卡比路話就算對方球員受傷，自己球員點都唔會特登踢個波出界，理由係太多人扮嘢喎。結果前日祖軍對博洛尼亞，薛比拿冇乘人之危，見對方受傷瞓低就踢個波出界，場邊嘅卡比路即刻面燶燶。查實呢場波喺人哋地頭踢，對方又唔似詐傷，抗旨都合理嘅。
效力曼聯嘅英格蘭新星朗尼，喺星期日被意大利某報紙選為今屆「歐洲金童」，我求大俠當然要恭喜佢。不過咪睇佢只得十九歲，而且重係得嗰一年新牌仔，原來佢已經擁有七架車，重架架名牌，單係花喺汽車嘅保費，每年就要十萬鎊（約一百五十萬港元），真係豪得起。
謝暉沉寂一季後，決定重出江湖，但估唔到呢位過氣中國球星加盟新球會又惹是非，曾經斟介佢嘅珠海中邦教練范志毅就話，大家一早有共識合作；結果謝暉最後改投申花，令「范大將軍」好嬲。其實，球員一日未簽約，都有權改變主意，「范大將軍」冇理由怨謝暉喎！