領匯（2382）司法覆核是否受理，最遲明日會有決定。無論結果係點，呢幾日已經好多人做咗輸家，唔怪得唔少人口中念念有詞。恒指最慘情之時，散142點，以呢個低位計，全港股票市值蒸發660億元。埋單指數輕輕唔見15點，唔少C輪表現靚過正股。領匯鬧劇如果落幕，個市有機會彈番若干百點，怕只怕事件中敗訴嘅一方，又提上訴，長夜夢多。
中銀C輪9169：有得升嘅恒指成份股，有16隻，中銀（2388）係其中之一，收14.85元，進帳0.20元，升幅1.4%，係拉高恒指第2大功臣，僅次於中移動（941）。中移動拉高恒指22.1，中銀拉高6.8。
中銀有勢，可以細注炒吓C輪9169，隻輪明年2月底到期，輪價24.7仙，平水，槓桿率6.0倍（有效亦係）。既然平水，唔使理引伸波幅。正股每郁5%，隻輪就變化30%。
恒指C輪4478：滙控（005）跌1.50元，拖低恒指53.8。過去5日，滙控由134元跌到130元，冇咗4元，有機會反彈，滙控反彈，則對恒指有利。執些少恒指C輪，博滙控拉高指數。
恒指C輪正宗對象係4478，明年3月底到期，輪價18.8仙，溢價2.3%，槓桿率17.2倍（有效10.8倍），引伸波幅19.9%。
九倉C輪9516：九倉（004）係醒神藍籌之一，收26.95元，升0.45元。若見回吐，吼C輪9516，明年3月到期，輪價27仙，溢價2.3%，槓桿率10倍（有效7.4倍），引伸波幅28.0%，數據靚。
章盛