古天樂上個禮拜已同無綫約滿，正式離開合作咗成十年嘅電視台，不過古仔已落實加盟契媽蕭笑鳴（芭姐）自資開設嘅經理人公司，自從芭姐離開無綫後，古仔一早決定跟隨佢，因芭姐喺無綫期間好照顧佢。
至於電影方面，佢同中國星嘅三年電影合約亦一樣屆滿，不過佢重要拍埋杜琪峰執導嘅《黑社會》上下兩部，同埋出年三月開拍嘅《武俠梁祝》先至全部清晒，到時佢就可以自由身拍任何公司嘅戲。
不過古仔同中國星嘅關係一直好好，相信約滿之後都會保持某種程度嘅合作關係。
而唱片方面，古仔同MusicNation嘅唱片合約都完埋啦，所以佢出年可以話係一切重新開始。
張學友同陳潔儀噚日喺深圳綵排舞台劇《雪狼湖》，由於近日學友身體不適又要周圍頻撲，所以搞到成個人落晒形。《雪狼湖》呢個月二十四號就會喺北京公演，學友話女主角人選重未定，但喺成班女新人之中，學友話比較睇好周岑，因為知道對方喺上海攞過好多新人獎。
美國新人女歌手Adrienne（劉雅詠）簽咗美國MIG唱片公司，下月喺美國出第一張碟，佢喺香港出世美國長大，佢專程返香港，噚日喺灣仔搞記者會，重唱咗兩首歌。Adrienne首主打歌重搵埋拳手泰臣客串，佢重讚泰臣好好人。
毛舜筠、谷祖琳同陳淑蘭最近為有線主持節目《星期六夜闖毛陳谷》，佢哋專請城中型男夜闖經過特別安排嘅擎天半島「香閨」拍攝。蘭子話好想請前男友方中信同黎明做嘉賓，佢重話自己望住黎明一定好緊張，至於谷祖琳就話想請梁家輝同吳彥祖，不過房祖名至係佢嘅心水型男。
無綫噚日公布上周收視，《天涯俠醫》平均收視二十六點，約有一百七十一萬觀眾，比上一個禮拜流失六萬幾觀眾；而張衞健嘅《功夫足球》首周播映，平均收視只得二十八點，即一百八十四萬人收睇，比《楚漢驕雄》結局篇，流失成二十萬觀眾，未能創造佢一向嘅「電視奇人」佳績。
胡兵同台灣長腿名模陳思璇噚日喺台灣出席宣傳活動，陳思璇大賣口乖話胡兵係佢嘅偶像，佢用國語講：「我前兩年大部份時間都在內地發展，早已聽過胡兵的名聲。」陳思璇重自薦夜晚帶胡兵行夜巿，但胡兵即時舉起三隻手指，原來噚日佢有三個通告，無法奉陪咁話。
