蘭西日前路經尖沙嘴彌敦道，望見地鐵站出口隔籬嘅金冠大廈，有幅勁大嘅朗豪坊廣告，有個動畫美少女問：仲尖沙嘴？Let'sgoshopping@Mongkok！
聽朗豪坊發展商鷹君話，花費過百億興建嘅旺角朗豪坊，出年一月舉行正式開幕慶典，為催谷商場人流，鷹君今個月不惜動用過千萬，大事搞宣傳，除咗喺電視同報紙等傳統媒體賣廣告，又向巴士公司，租用過百部巴士車身廣告位，務求去到邊，都睇到朗豪坊個名。
更加別出心裁嘅，就係挑戰其他傳統核心購物區商場，銅鑼灣崇光百貨對開嘅巴士站，都有一大排類似廣告，問你：仲銅鑼灣？
除咗全港最旺嘅兩條街，同系廣告亦出現喺銅鑼灣、尖沙嘴、旺角同九龍塘四個地鐵大站入面，其中九龍塘就甚具策略性，放正喺又一城出口，似乎想截晒敵場嘅人流喎！
聖誕節係零售業嘅大日子之一，商場大業主都要想盡辦法搞新意思。地鐵嘅九龍灣德福廣場，同青衣嘅青衣城商場，由上個禮拜六起，安排首批四個「流動購物大使」喺商場穿梭，主動向顧客及商戶，提供最新嘅優惠情報，同新貨資訊。
地鐵總商場市務經理陳嘉明話，安排呢項服務後，德福廣場人流多咗一成。
聽講，呢四位購物大使，精通英語同普通話，重好熟悉商場幾百個商戶嘅資料，為顧客提供好似朋友咁親切嘅意見。
另外，九龍建業嘅旺角始創中心商場，呢個聖誕節，用咗逾三百萬做宣傳，商場嘅二百間潮流店舖，會分為五個蒲區，等消費者易於選擇。
深井海雲軒月底收樓，部份業主唔想上會，所以及早沽貨離場，甚至願意以低於市價賣樓。美記朱志龍話，二座中層D，九百七十九呎，剛以三百一十五萬售出，呎價三千二，比起上個月同類成交平咗約一成。
當然，由於樓價升咗，賣方應該仍然有錢賺。呢類快將入伙嘅新盤，話唔定成為用家執平貨嘅機會。
由於業主願意減價，海雲軒呢排睇樓人數，比起上個月同期多咗兩成。
海雲軒今個月共有七宗買賣，與上月同期相若，平均呎價三千八，微跌一巴仙。
澳門樓市交投暢旺，吸引本港代理行，過江搵食，中原集團今個禮拜四就有五間分行正式開幕，集團主席施永青重親自出席剪綵。
澳門分行由郭朝隆打骰，員工數目逾六十人。
郭朝隆話，澳門分行已經促成幾宗大手買賣，而氹仔分行，開業第一日，即日又錄得成交。中記今次嘅澳門旗艦店，三面單邊，夠晒搶眼。
中原同美聯喺澳門嘅競爭，睇嚟都係屬於起步階段，當地地膽代理行，究竟有乜計迎戰呢？
世紀21最近開班教授「居屋買賣知識及方法」，由世紀21奇豐董事李峻銘與區經莊振耀主講，當中加插實例、個案及練習，等前線員工可以更深入了解，點樣做呢類買賣，同埋掌握居屋市道最新形勢。
世紀21嘅加盟商，好多都係地膽代理，日常處理成交，點都會接觸到居屋買賣，講座肯定可以幫到佢哋，特別係新入行嘅前線代理。
火炭晉名峰唔夠一個月賣咗八成半，造價唔錯，頭段主力賣過千萬嘅貨，近期加開兩座細碼，最平四百萬。聽聞，富豪集團執行董事范統，都買咗件兩房嚟投資，呎價五千幾，五百萬有找。
火炭晉名峰，近日銷情節節上升，代理落力搵客，因為佣金和味。
發展商永泰與南豐，一開始已經畀個半佣，做得多就可以跳bar到兩個佣。利記美記齊齊表示有得跳bar。
電郵地址：
