領匯（2382）單「畸士」未拗掂，港股噚日就繼續走軟，恒指最低落到13760，跌過140點，但午後就逐步收復失地，且曾一度倒升，收市13886，微跌15點，成交只得170億元，投資者大多觀望領匯結果，不敢貿然入市。不過，期指個勢就強番，收13873，低水大幅縮窄到只得13點。
其實，噚日恒指下跌，淨係一隻滙控（005）已睇起有餘。滙控最低曾跌穿130元大關，尾市鬥打價，結果都係淡友打贏收130元，跌1.5元，伸算恒指就跌54點。其他藍籌榮辱互見，和黃（013）同新地（016）較強，前者升1個位，後者升0.5元。
恒指由14339回落，到噚日的13760，跌咗579點，短期有機會孕育一次小反彈（暫時以反彈視之），但若升番上10日線（14101）之上，又要重新估計。今次調整市，有一個現象，就係未見有基金好明顯咁造淡，而聽佢哋口風，個市亦應該唔會大散，甚至佢哋頗大程度上重係睇好後市。睇下今次在全面轉淡的大形勢下，個市會唔會戲劇性地回升。
芬佬睇好嘅股票，好多都未必即時有反應，但中線就好大機會見功，好似佢哋睇好嘅新地（016）、信德（242）同和黃（013），一來呢輪俾個市拖落嚟，二來佢哋亦好刻意咁㩒到實一實，但只要佢哋準備發圍之時，呢一類基金股隨時會有脫胎換骨嘅表現，升番10多20個巴仙亦好閒。
和黃推出3G後，形勢似乎愈來愈有睇頭，唔少大行都看好其前景，噚日美林亦發表報告，指和黃3G業務前景正面，投資評級為「買入」，目標價88元（即係有25.7%的上升空間），其中3G業務佔股值19元，其他業務則佔69元。呢個目標價比高盛的80元同一波的82元都要高。
不過，大華繼顯就指和黃只專注3G業務，定價上可更進取，從而擴充其市場佔有率，估計到2010年時，和黃3G業務每股值40元，其他業務值60元，故和黃長線可值100元，呢個係目前最樂觀的估計。
和黃股價在70元水平整固，繼續調整的機會存在，但升破72元阻力即可開展新升浪，量度上升目標係80元。
郭兆誠