性感小雲雀KylieMinogue近排為咗催谷全新單曲，四圍飛去宣傳。不過Kylie大前日喺德國嘅電視節目表演時，唔小心扭親足踝關節。儘管整傷隻腳，但Kylie第二日已經即刻飛返去倫敦表演，真係夠晒專業。
話說Kylie大前日應邀上德國高收視電視節目《WettenDass..》表演，當日佢着住一套透視晚裝加對三吋高踭鞋，鬼火咁靚喺度載歌載舞時，居然失手拗柴，扭傷足踝，雖然小雲雀暫時飛唔起，但佢第二日照計劃安排飛到倫敦，出席音樂節目《TopofThePops》同電台Radio1合辦嘅聖誕派對，Kylie當日表演時依然着條短裙仔，絕不欺場，我羅拉見佢跳得咁落力，相信佢嘅腳傷應該都冇乜大問題。
Kylie做事咁認真，總算有回報，好似佢啱啱喺上星期推出隻新單曲《IBeliveInYou》，打入咗英國細碟榜第二位，僅僅輸畀由群星合唱、為蘇丹難民籌款嘅《DoTheyKnowIt'sChristmas》，咁就證明Kylie總算冇白費心機。