前立法會議員劉炳章涉嫌利誘對手唔好參選，噚日畀廉記請咗去問話。有口痕友同八方講，真係戥PC劉唔抵，其實好多人都勸退對手唔選啦，好似中聯辦咁，傳聞成個港進聯，都畀中聯辦勸退唔好選，廉記係咪應該請高祀仁飲吓咖啡？
口痕友愈數愈多，好似田少咁，有報道話，田少為咗幫黨友林健鋒喺商界自動當選，就勸蔣麗莉唔好選，重暗示會支持蔣麗莉角逐下任香港總商會主席；甚至有傳聞，唐唐同佢老竇蔣震講數，又使唔使請田少同唐唐去調查？
工聯會都係，為咗畀鄺志堅同王國興做議員，原本嘅梁富華梗係要退啦，不過工聯會同時又資助梁富華去外國讀書，咁又係唔係「間接利誘人唔選」呢？咁民主派搞協調，大班、學者鄭宇碩同朱牧師，都有勸退人唔選，雖然民主派無乜牙力，最後都勸唔到人退選，加上班民主派冇乜錢去利誘人，如果唔係，分分鐘俾廉署請去飲咖啡！
傳真︰2623-9278
電郵︰