馬主H到中文大學參觀畢業禮，順便祝賀朋友仔女大學畢業。校園內見到一條banner：「反對國際化，反對增加床位。」於是馬主H問一位中大教員：「學生反對乜嘢呀？」教員話：「劉校長要推動國際化，增收外國學生，但宿位唔夠，籌款起宿舍，需要幾年時間，一個短期解決宿位不夠嘅方法就係改裝一啲宿舍房間，每間房增加一張床。學生可能認為咁做法會損害佢哋嘅利益與舒服環境，咪搞反對囉。」反對嘅學生多唔多呢？據呢位教員講，反對學生會係少數，但大學生有權乜都反對，事屬平常。
馬主H認為如果為咗增加床位而反對國際化，目光未免太短淺。以佢所知，香港嘅大學宿舍已經相當舒適，直情係國際一流水準，即使每間房加多一張床位，仍然唔會差得去邊。馬主H啲朋友子女住過哈佛、耶魯、UCLA、USC（南加大）呢啲一流大學嘅本科生宿舍，設施甚為刻苦，你估讀書係去住三星酒店咩。
馬主H揸車離開沙田之時，經過圓州角，見到一大批居屋（包括短樁居屋），空空如也曬太陽，如果拆晒啲短樁居屋，環保團體會聯同廖秀冬上街示威都唔定，但居屋就話凍結暫時唔賣啫，兩年後廢物重用，仍會推出市場。啲短樁居屋又點？照計唔會倒塌嘅，但因有疑點，法律上一定唔可以賣，暫時借畀大學做學生宿舍又如何？都係廢物利用啫，房委會完全冇損失㗎。中大啲建築師、工程師可以研究吓。
返到中環，馬主H與投資銀行家賓架L飲茶，賓架L提到，財政司司長唐英年最近獲悉，最出名嘅大型投資銀行，近年甚少聘請本地大學畢業生。賓架L話：「如果唐司長問我點睇，我就會話畀佢聽，本地大學生競爭力唔夠，主要係英文與國際常識。題目太大，第日先至講。」