達仔星期日冇驚冇險做咗白鴿黨主席，雖然佢老哥同何俊仁一樣，唔算係高人，但係正所謂矮仔多計，達仔待人接物，應該醒過森哥，佢今日已經同傳媒舉行上任後第一個茶會，任問唔嬲。
八方喺前晚十周年晚宴，恭喜達仔之餘，亦恭喜埋佢愛妻陳樹英（阿Tree）以二百二十票當選中央委員，得票比達仔重高出三十一票，點知阿Tree話，佢本來唔支持達仔參選，原因好易明，達仔𠵱家已經鬼咁唔得閒，佢哋兩個連小朋友都唔生，做埋主席真係唔使見咩。
不過，阿Tree永遠係達仔最後靠山，達仔笑住話，「只有樹英管得我掂。」重即刻捉住老婆隻手畀八方拍照，認真恩愛。夫婦同心，其利斷金，主席夫人亦係中委，可算第一人。
至於楊森，喺交職之時亦表現得好輕鬆同大方，八方笑佢以後可以多啲照顧愛妻同細路，佢亦回以一笑，心照不宣啦。
（圖）李永達（左）當選白鴿黨主席，握住老婆陳樹英隻手合照，笑得好鬼甜。
傳真︰2623-9278
電郵︰