昨日急跌的基金股，除咗有好大筆應收帳唔知收唔收到的南京熊貓（533）外，重有剛公布發行可換股債券的北泰(2339)，跌幅有成11.43%咁多，真係相當矚目。
北泰向來係基金愛股，噚日急跌，唔通係芬佬唔鍾意公司批換股債？
經紀黃話唔完全關發行換股債事，而係有證券行出報告睇淡北泰，聽講出報告間行旗下的基金坐咗好多北泰，早前已經減持緊，今次報告一出，或者會觸發更大沽盤都未定。
北泰噚日低見1.78元，收1.86元，跌11.43％，成交股數1488萬股，金額2765萬元。
北泰早排公布以1.82億元入股一間汽車零部件公司40%股權，雖然有分析員睇好，但噚日出報告睇淡的證券行則話睇唔到有策略上意義，兼夾引來集資需求，而且呢單收購，係向公司一位前非執行董事買入，引起分析員關注。
慕容小初