若果你已經將《GT4Prologue》玩得通通透透，嚟緊嘅亞洲遊戲展(AGS)一定啱晒你，因為今次遊戲展中，SCEH會將12月28日才正式發售嘅《GT4》於會場供參觀者試玩，相信玩家都不會錯過。《GT4》可以話係史上最受歡迎賽車遊戲，一直成為各大遊戲展嘅重頭焦點之一，吸引力過人，今個星期筆者就有機會先感受一下《GT4》嘅魅力。
記者：許福合
今次試玩《GT4》，SCEH比一般遊戲來得嚴謹，雖然遊戲半個月後就會推出，但仍不能進行錄像式攝錄，以往就比較少見，而今次試玩《GT4》版本為Preview2，雖然係Preview，不過已經可讓筆者試玩到最想玩嘅新增項目，包括香港賽道、BSpec及Photo模式。
香港賽道路窄難度高
今次《GT4》最令香港玩家有驚喜嘅係新增咗香港賽道，主要於尖沙嘴地段作賽，由於場景時間為傍晚，當玩家將跑車轉入彌敦道，隨即會見到大量熟悉招牌亮起，好有親切感，另外街頭裝飾物亦好考究，例如路旁嘅巴士，雖然不會走動，不過好明顯係一架城巴，可看出設計時做足資料搜集，難怪推出日期會一推再推。香港車多路窄，《GT4》都有真實反映出來，自問對賽車都有幾分自信，不過都得個「炒」字，尤其轉入海旁嘅急彎，必撞！最後發現自動波走香港賽道非常難，揀選手波車會比較好揸。
《GT4》包括有50條賽道，與其他賽車遊戲比較，明顯覺得大幅強化遊戲中「人」嘅表現，包括車手、觀眾與工作人員，動作都變得更詳細逼真，可欣賞到維修站技師們工作，以及周圍觀眾閃躲賽車等動作。
BSpec教練模式
BSpec模式自公布以來，都令唔少人產生疑問，究竟玩咩？經筆者摸索過後，發現其實同一般育成足球遊戲類似，玩家再唔係車手，而係車隊教練，玩家不再要親自駕駛。簡單來講，玩家只須下達基本指示，讓車手自行發揮。比賽中途，玩家可因需要改變視點，亦可選擇同時其他賽車作視點，而畫面上會有齊全資料顯示，包括單圈紀錄、維修站通過時間、時間差距、停站次數與圈數等，玩家要做嘅就係下達超車、調整車速及進維修站等指令。初次玩當然有啲唔慣，由於BSpec並非考驗玩家本身駕駛技術，所以賽前賽車調校就變得重要，需要作多次試跑，再針對不同場地選擇合適賽車、車胎、零件，先至係至勝之道。
Photo模式印相留念
Photo模式亦係另一個比較創新玩法，基本上可選擇賽道一處作場景，亦可一邊駕駛一邊拍照，進入Photo模式後，操作介面變得好似電腦一樣，指標會變作滑鼠方式操作，方便作選擇。角度亦有高度彈性，上下左右，前後都可任意調校，提供非常多組合讓玩家自己發揮。而完成作品除咗貯存於記憶卡內，最特別係可經USB接駁打印機，不經電腦直接將相片印出與朋友分享，而暫時印相玩法只支援EPSON打印機，對Photo模式有興趣就要留意。
遊戲資料
主機：PS2
製作廠商：SCE
類型：賽車
遊戲人數：1-6人
發售日期：12月28日
售價：未定
(C)SonyComputerEntertainmentInc.