聖誕鐘聲處處響起，話咁快就到普世歡騰嘅聖誕佳節。大使細個嗰時過聖誕一定要有齊三樣嘢：一隻裝滿禮物嘅聖誕禮「襪」、食聖誕大餐同睇燈飾。
但話說回來，未必個個家長都有能力扮聖誕老人，送禮物畀仔女或者搞慶祝活動。
蘋果日報慈善基金每逢大時大節，都唔會忘記一班處於貧苦環境嘅小朋友。今年聖誕Boxingday（二十六日），基金會邀請一班不幸罹患腎病同埋地中海貧血病嘅小朋友與家長，一家大細去灣仔香港演藝學院免費欣賞一齣名為「細路．細路．聖誕Show」嘅大型兒童舞台劇，呢齣劇由著名舞台劇演員詹瑞文擔綱演出，內容圍繞細路仔嘅日常生活有趣細節，小朋友一定好有共鳴，同場重有獎品豐富嘅遊戲環節，務求令小朋友滿載而歸，暫時忘記疾病帶嚟嘅痛苦。
喺呢度我哋要特別多謝一位善長，佢一擲十萬蚊，話要用嚟請晒啲冇錢食聖誕大餐嘅小朋友，有剩嘅就畀佢哋娛樂吓，於是我哋就安排一班病童去睇兒童劇，我哋重會充當「聖誕老人」，向一班嚟自綜援或低收入家庭嘅兒童大派聖誕禮物。
以上咁連串豐富聖誕節目，大家記得留意暖流版稍後嘅報道，睇吓班可愛小朋友點樣過一個暖洋洋嘅聖誕。
暖流熱線
電話：29908688
傳真：23702192
電郵：
網址：