民主黨噚日選完正副主席後，拉大隊去黃大仙新光酒樓筵開六十圍慶祝創黨十周年。近日同民主黨撐到行嘅孫公都畀面出席，唐唐就人唔到禮到，送咗一箱十二支八九年嘅名貴紅酒畀佢哋拍賣籌款，每支市值千五蚊㗎。另一嘉賓信和黃志祥重大手筆，一共捐咗兩支八二年武當，每支皮幾嘢。最後連埋其他林審嘢共籌得十六萬九，白鴿黨好大方，宣布分六成捐款畀民網同民主動力。
同場加映歡喜冤家和解篇，曾經同華叔筆戰嘅馮煒光用咗兩萬五千蚊投得華叔嘅字畫；大班更加自我犧牲，話願意畀喺爭普選上左搖右擺嘅譚香文鬧幾句籌款，大好機會，譚香文梗係唔放過啦。
（圖）孫明揚（右）呢排同民主黨撐到行都嚟晚宴，候任主席李永達梗要同佢握下手。
傳真︰2623-9278
電郵︰