紅灣半島醜聞，新鴻基及新創建集團冚牌，「人民力量」大勝，不過據接近中方高層人士話，其實係中央人民政府親自喝停！
諗諗吓又係！地產商連老董都唔怕，位位老細，嬌生慣養，尤其係啲太子，區區民意，佢又點會放在眼內，若然唔係胡溫拍枱，地富反壞右，最怕就係共產黨，地產商名列地富反壞右「五惡」之首，共黨發火，又點敢唔冚牌！
知情人士話，嗱，溫總經已畀咗貼士畀香港人！佢喺歐洲訪問，無喇喇講，對於大嶼山嘅山火，佢好心痛！
呢句說話，係咪好古怪呢？溫寶啱啱至吟完首詩：「會當凌絕頂，一覽眾山小」（呢句詩聽講係商台《光明頂》專利註冊口號），出自杜甫，講登上泰山絕頂之後，一覽先至覺眾山小！大嶼山最高嗰座叫鳳凰山，一千米都唔夠，屬於「眾山小」之列，溫寶咁高層次，大嶼山佢又點會放在眼內？大嶼山山火，閒過立秋，相比大陸煤礦變工人地獄，簡直係濕碎到好似蚊咁細！點知佢偏偏就揀咗大嶼山山火嚟講！知情人士透露：溫寶一石二鳥：大嶼山山火，破壞生態環境，故此溫寶查實係借山火嚟警告董團夥好收手，唔好再污染自然生態！團夥近日污染自然生態嘅首惡行為，咪即是紅灣半島拆樓大醜聞囉！好彩郭氏兄弟讀慣福音，上帝嘅說話，佢哋聽得明啫！
溫寶另一個警告嘅目標，當然就係財政司司長唐唐喇！唐唐想搞大嶼山大開發，喺溫寶眼中，即是放火燒大嶼山！皆因為胡溫上台之後，對於自然環境問題十分關注，由李鵬認頭嘅長江三峽大水壩，重係俾溫寶親自抽秤㖭！
溫寶專搞宏觀調控，一世人最憎假大空嘅所謂政績工程！地方共官到處起五星酒店、高爾夫球場，以為擦鞋，都遭到溫寶痛斥！特區董團夥七年半，好嘅學唔識，大陸衰嘅就樣樣學到足，你話溫總個內心，又點會唔似大嶼山火龍咁㷫？
消息人士話：現時國家最怕就係港人元旦日又搞示威遊行，所以紅灣嘅火頭，一定要窒息在萌芽狀態。
咁即是話，香港人嘅示威遊行，所發出嘅聲音，胡溫係承認嘅，亦都好慎重咁聽取！所以，亦可以講係人民力量勝利！溫總咁畀面港人，港人應該將紅灣改名為「溫家灣」，紀念溫家寶出手相助，港人齊胡溫，其利斷金！
傳真︰2623-9278
電郵︰