荷李活性感女星安琪蓮娜祖莉（AngelinaJolie）三年前同安東尼奧班達拉斯（AntonioBanderas）拍過一部叫《激情叛侶》嘅電影，原來呢對男女曾經喺戲中有一段火辣到好似打真軍嘅床上戲，而呢段戲近日就曝咗光，搞到安東尼奧個老婆美蘭妮姬菲芙（MelanieGriffith）囉囉攣。
安琪蓮娜祖莉同安東尼奧班達拉斯當年合演嘅《激情叛侶》以十九世紀為背景，講安東尼奧飾演嘅巴西咖啡店東主憑寄信認識由安琪蓮娜扮演嘅美國女子，之後重「買」佢返巴西做老婆。套戲都有唔少裸露場面，但原來重有一段長十分鐘嘅至激床戲喺上映嘅時候被人剪咗。
呢場床戲都拍得好逼真吓，安琪蓮娜同安東尼奧都表現得好投入同肉緊。由於段片拍得好逼真，所以好易呷醋嘅美蘭妮姬菲芙成日都好想知道佢老公安東尼奧係咪同安琪蓮娜假戲真做。雖然美蘭妮拒絕回應呢件事，但佢啲知心老友就話：「有邊個女人想睇到老公同第二個女人做愛？雖然係電影，但睇落真係好真。」聽聞安琪蓮娜都唔想段片曝光，唔通佢都好後悔同安東尼奧有越軌行為？