其士國際（025）上周五公布中期業績靚靚，股價即刻有反應，彈升愈11％，收7.20元。原本小初以為消息刺激短暫，過後就會算數。
但經紀黃話唔係，聽講人哋重有後着，唔會咁短癮。相信隻股稍後陸續有消息，當中可能涉及收購合併之類，所以若見股價回落番多少，可以諗吓。
其士國際中期盈利比去年同期勁升66%，有成1.25億元，兼夾有中期息每股20仙派發，相當唔錯，所以上周五股價最高見過7.35元，收7.20元，升11.63％，成交股數187.79萬股，金額1322.5萬元。
其士國際盈利上升，主要係來自建築及機械工程，其中管道技術業務表現理想係重要推動因素，據講公司未來會以此為重點，繼續大力發展。
另外，早前股價已見異動的結好控股（064），上周五亦突然發難，急升23.49％，收1.63元。結好已講明唔會沾手濠江賭業，只係傾緊一間金融服務公司。但經紀陳話，傳聞今次炒上，主要來自濠江炒家的動力。
慕容小初