台灣立委選舉，藍營贏咗，個市少咗一個壞因素。領匯（2382）上市司法覆核受唔受理，今日有結果，結果如何主宰短期大市方向。領匯事件中，諗起4個字，就係「過街老鼠」。
中移動C輪4476：大市欠明朗，炒C輪千祈咪太勇，一係等候領匯司法覆核受唔受理有結果後先至做嘢，一係等股價跌到較低水平時，博正股反彈而買佢哋啲C輪。
中移動（941）過去1周跌1.20元，收25.60元，若然跌到25元邊邊，可細注諗吓C輪，主角係4476，明年3月到期，輪價30仙，溢價3.4%，槓桿率10.2倍（有效7.1倍），引伸波幅30.6%。比較短期嘅2181與2206，溢價低啲，亦啱短炒，交投亦唔錯。
中電信C輪4499：中電信（728）過去1周跌0.20元，收2.75元，跌幅大過中移動。若見跌至2.65元左右，亦可博反彈細注買C輪。
中電信C輪交投、條件都遜於中移動C輪。4499輪價46.5仙，溢價3.5%，槓桿率5.9倍（有效4.3倍），引伸波幅37.6%，爆炸力係細啲，但勝在明年6月至夠鐘，大把時間。想槓桿率大啲，則揀4577，當然要畀高啲溢價。
聯通C輪：聯通（762）過去1周跌0.40元，收5.9元。再跌，估計會有支持及技術性反彈，冇乜C輪揀得落手，一係溢價太高兼無成交，一係屬數據好難計嘅特種輪。博反彈都只係適宜買正股。
章盛