火炭晉名峰熱賣，兩日沽出百幾件，呎價過萬，以非傳統豪宅區嘅豪宅嚟講，成績突出，多少都要歸功於發展商廣泛嘅宣傳攻勢。
蘭西最近晚上途經紅隧，遙望尖東新文華中心，見頂樓有個相當耀眼嘅晉名峰廣告牌，有射燈射住，重有旗幟迎風飄揚，夠晒氣勢。
聽發展商講，今次係新文華中心首次願意租出頂樓廣告位，位置剛好配合晉名峰，佢個示範單位就喺附近嘅新東海中心。呢個廣告位要收幾多錢、租期到底有幾長，發展商唔肯透露，只係暗示話，租期起碼到個盤賣清為止。
其實，呢幅巨型海報，亦同時有出現喺九鐵地鐵交滙嘅九龍塘站，都係每日往來新界與市區人士必經之處，加埋電視同報紙廣告，大概將全港經常來往中港人士一網打盡，大收宣傳之效。以一個數百伙嘅樓盤而言，晉名峰相當落本。
年中喺本港上市嘅廣州地產代理公司合富輝煌，喺上海開設總部及分行，加強全國嘅據點。主席扶偉聰話，今次喺江蘇路及長寧區開設一及二手物業代理總部，重喺長寧、靜安同徐滙區開咗三間分行。𠵱家集團喺上海嘅員工數目達一百二十八人。
合富輝煌喺華東嘅業務範圍將包括上海、南京、蘇州、常州、南通及揚州等城市。合富輝煌九五年喺廣州成立，連續八年評為廣州一級代理行。
上海嘅龍頭代理行係金豐易居，今次合富輝煌開拓上海代理業務，兩雄相遇，唔知當地嘅代理市場會有乜變化呢？
港人生活太緊張，經常「大頭蝦」。保險公司Aviva委託TNS做調查，訪問一千名十五至六十四歲港人，發現啲人離家外出，最多人唔記得嘅，係關上窗戶；兩成忘記關掉電器；一成四冇關煤氣熱水爐。
最驚人係九巴仙受訪者，竟然大擺空城計，經常冇鎖上大門就去咗街。
調查又指出，四成半受訪者，過去一年冇請專業人士做家居安全檢查。
睇完呢啲調查資料，日後外出、特別係去旅行，除咗要加倍留意呢啲事項之外，買定份保險，都可能係方法之一，返到屋企發現出事起碼有得賠。
上星期，有消息話，華人置業以二千二百八十萬，賣出半山帝景園五座高層A，賺四百幾萬。不過，華置方面話畀蘭西聽，單位唔係佢哋嘅；呢個單位原本係建萊銀主盤，大半年前，以一千八百四十一萬成交。
蘭西向代理了解過，事緣華置有關人士，的確持有帝景園單位，亦係向建萊銀主買入，𠵱家放緊盤，一時間，市場訊息混亂。
講開帝景園，最近又再有十三件建萊銀主盤，透過仲記標售，主要喺第四、五座中高層，下個月截標，相信呢批貨對買家有一定吸引力。
買樓自住，若果知道風水旺自己，入市意欲肯定強啲。一名又一村豪宅業主，話說佢細佬買入畢架山一號之前，兩姊弟相約，搵埋風水師一齊去睇樓，知道個屋苑風水好，先至扑槌。
日前，佢細佬新居入伙，做家姐嘅，梗係去參觀一番，其間重興起念頭，自己都買番一間，方便互相照應。
家姐問過風水師，知道畢架山一號風水都好夾自己，所以用一千三百六十萬，買入十一座中層B室單位，面積近千五呎，呎價約九千三，係近期新高。
中記余社朝話，畢架山一號，今個月到𠵱家，共有八宗二手成交，造價就較上個月升咗五巴仙，現約九千至萬三蚊一呎。
電郵地址：
