「聖誕狗」一身節日裝扮，呢日佢嚟到醫院探訪病人，重即興表演看家本領──凌空飛撲，咬住小皮球，然後撻喺地上，若無其事。呢位叫Bobby嘅動物醫生成員，日前跟住大夥兒動物醫生進行親善活動，好逗人喜愛。
聖誕節普天同慶，但唔少身在醫院嘅長期病患者就要喺病房過節，有啲更無親無故，淒冷度日。非牟利團體「動物醫生」呢個月組織咗多次親善活動，派出多頭可愛小狗充當聖誕狗，前往醫院及護養院等地方，陪病人、長者嬉戲玩耍。
動物醫生成員Bobby今年三歲，係生性好動嘅雄性哥基狗。Bobby日前同多位動物醫生一起前往瑪嘉烈醫院探訪，一眾大狗小狗裝扮成聖誕老人同聖誕鹿，與病人分享節日喜悅。Bobby更一時興起表演接皮球，身輕如燕嘅佢，一躍而起，姿勢優美。
動物醫生創辦人陸茵玲話，每年聖誕節，動物醫生均會打扮成聖誕老人，到唔同嘅醫院、學校及護老院探訪，為有需要人士帶來溫暖。全港現時有六十多隻動物醫生，當中包括狗狗和貓貓，明年開始，還會有鸚鵡加入行列。
為了籌募經費，動物醫生將於本月十九日喺大欖郊野公園舉辦一年一度嘅《2004動物醫生步行日》籌款活動，同日加插「聖誕狗狗扮野Show」比賽，由狗主替愛犬悉心打扮，俾數百頭狗隻預祝歡樂嘅聖誕節。
（圖）呢兩隻動物醫生狗逗得病人好開心。
動物醫生提供圖片
傳真︰2623-9278
電郵︰