攞綜援嘅公屋居民申請法律援助，申請司法覆核，阻止領匯上市，法庭今日聆訊。呢單官司比較騎呢，五十一萬香港投資者用二千八百億元申請領匯Reit嘅基金單位，勢唔估到會遇上今日嘅場面。左丁山唔識法律，就教於熟悉上市程序嘅財務伍。財務伍斬釘截鐵咁話：「我唔係律師，但我相信銀紙。有銀紙就可以請到全港以至全世界嘅最好、最精英律師。好多年前我聽過一位投資銀行家之中嘅投資銀行家講：我哋畀千幾萬請律師，對方嘅政府律師，年薪得百零萬，如果我哋輸咗，就證明市場理論係錯嘅！」
財務伍睇過領匯招股書，第三十五頁至三十六頁列出所有法律顧問嘅名稱，啲律師行夠晒大。管理人（領匯管理有限公司）嘅顧問係年利達律師事務所（Linklaters）（香港及英國法律）、謝爾曼．思特靈律師事務所（Shearman&SterlingLLP）；物業賣方之法律顧問係高偉紳律師行（CliffordChance）；聯席全球協調人（滙豐、高盛、瑞銀）之法律顧問係安理國際律師事務所（Allen&Overy），可講係粒粒皆星，收費唔便宜嘅律師樓，中環人盡皆知。其中CliffordChance好似係全球最大（以律師人數計）。
財務伍話：「咁嘅鑽石律師陣容都輸得？你話佢哋冇將『房屋條例』第四條老早驗屍咁驗，我就唔信，點可能俾人偷到雞呀，就好似車路士對查爾頓，一定冇冷爆！」財務伍所言有理，但律師洪就話：「波係圓嘅，皇家馬德里都會輸波啦。上到法庭，乜都有可能發生。」左丁山都有申請「領匯」，但冇做孖展，即使領匯上唔到市，唔會蝕孖展利息。證監會、銀行、證券行就好緊張，呢單涉及二千八百億元嘅官司，世界矚目，肯定成為未來法律學院學生研讀嘅個案。