旅遊淡季，聖誕節前出發，國泰及新加坡航空公司來回倫敦的經濟客位都只係四千幾唔使五千蚊，新加坡航空公司重有得停新加坡，真係抵到嘔。
之但係以在下嘅龐大身形，塞在經濟客位上，足可以「釀」滿整張座椅，莫講話自己動彈不能，就連啲手踭嘅踭頭踭尾，大髀嘅鬼祟肉都會不知不覺間「攝」過隔籬位，短途就話最多當點咗穴唔郁，大嗱嗱十三個鐘頭機程則係一個大問題，費事隔籬位瞓瞓吓覺見到有半隻髀攝咗過嚟，重以為係有飯食。
商務客位一律冇價講，三萬至四萬元不等，四千對四萬，十倍價錢，制唔過。皇天不負有心人，在網上摷到維珍航空有一款叫做「PremiumEconomy」，一架機只有廿二個呢種位，闊過經濟艙少少，食同樣嘅嘢，但係就做緊半價，大約一萬元左右，噢，我找到了！
輪到搵酒店，翻查地圖，在倫敦最就腳便是住在Knightsbridge或MarbleArch附近，但酒店房租揦脷得嚇人，五星級要日租三百鎊以上，四星級也要二百鎊左右，終於透過priceline.com、londonbyclick.com、milesfaster.co.uk，找到了一間在MarbleArch，正正在OxfordSt、RegentSt與NewBondSt的購物鐵三角中心點的四星級「designerstylehotel」，經過一大輪網上討價還價，大約一百鎊一晚連早餐成交，算係抵到咩咁……