洪朝豐早年投資表舖生意失敗後，走咗去佢前妻開嗰間「洪葉書店」幫手，事業發展一直未如理想，但天無絕人之路，洪朝豐最近獲美國傳媒MultiCulturalRadioBroadcasting嘅老闆賞識，邀請佢去洛杉磯發展，對洪朝豐嚟講，無疑係一個重生機會。
前日馮仁昭同身在洛杉磯嘅洪朝豐傾電話，佢好開心咁話：「之前我幫呢邊AM1430電台做嘅節目好受歡迎，電台嘅大老闆就問我有冇興趣過嚟發展，要我放棄香港一切走去美國，初時都十五十六，但我姐姐話難得人哋賞識你，人生唔係有幾多個機會，我個仔又贊成，所以決定過嚟試一試。」
洪朝豐續說：「我過咗嚟三個星期，幫緊AM1430電台做《日月星辰》節目，遲啲又會做一個新電台頻道嘅主持同埋策劃，工作方面畀到我好大滿足感。」
韓國靚仔元斌早前被前經理人公司JMLine控告佢偷走為期三年嘅合約，然後擅自更改合約內容，將電影、戲劇等收入據為己有，合約總值三億韓圜（約二百二十萬港元）。元斌𠵱家嘅經理人公司駁斥對方故意抹黑，計劃採取法律行動反告對方。
朱茵噚日去馬鞍山新港城中心出席活動，着低V衫襯短裙嘅朱茵好親切咁同小朋友合照，又大唱新歌，令fans熱血沸騰，朱茵話：「我覺得觀眾聽唱歌，除咗聽之外，都想有視覺感受。」問朱茵又唱又跳驚唔驚走光？佢話：「我唔知，因為我太投入，不過我已經做晒打底功夫。」
李妮噚日擔任工展小姐嘅「最合眼緣工展小姐」選舉評判，佢透露計劃明年喺香港註冊結婚，但唔會擺酒，佢話考慮緊婚後係咪留港生活，李妮指雖然丈夫長居美國及喺嗰邊做嘢，但佢話唔捨得留低媽媽喺香港，認真孝順！
張衞健前晚喺無綫為《歡樂滿東華》義賣足球，有報道話佢同女友張茜分手，健仔前晚冇否認，亦冇承認傳聞，佢淨係話：「唔講喇！感情嘅事我唔會講，我只會話喺我一生當中，除咗我阿媽之外，對我最好同最愛嘅女人就係張茜。」
梁漢文噚日以「救護之星」身份，去沙田出席「救護服務推廣日2004」活動，做過童軍嘅梁漢文曾經智救同伴，佢話：「有次去露營，突然有個童軍大叫，原來有隻蜜蜂入咗佢隻耳，大家唔知點算，後來我叫佢閉氣，隻蜜蜂就走咗出嚟！」
