日韓興啲乜：<br>禾稈冚珍珠隱蔽商廈發掘型男潮服

日韓興啲乜：
禾稈冚珍珠隱蔽商廈發掘型男潮服

全是一個偶然，遇上這個令我對韓國時裝設計大大加分的品牌GeneralIdea，話說當日無無聊聊在漢城街上眈天望地，在藍天白雲底下無意中看到「天上天下」四個中文大字，咦？點解有座咁過癮的大廈嘅？改變原定路線入內昅昅，發現大廈每層只得一間舖，底層是型男時裝店GeneralIdea，樓上重有得食有得玩，原來禾稈冚珍珠，過門不入就走寶。

記者：張銘恩
攝影：陳陶鈞

地下：
潮牌GeneralIdea多星捧場

老實講，就算裴勇俊在日本比木村更紅，但筆者從來都主觀認為韓國人在時裝品味方面是「娘」的，和日本比？即係叫Edison同Eminem來個RapBattle，一句到尾無得Fight！直至當日發現這個韓國本土男裝品牌GeneralIdea，才令我對韓國時裝設計另眼相看，由停泊門口的店舖貨車Mini仔，以至舖內裝修，當然還有最重要的服裝設計本身，全部得分甚高！GeneralIdea的設計人叫Bumsuk，暫時只此一家專做男裝，據店長說，Bumsuk本人熱愛HipHopMusic，所以大家會在收銀機旁看到DJ打碟的架生，其設計甚受當地韓星歡迎，Rain、金男振等都是捧場客，大量潮流雜誌如《Vogue》、《Elle》同《Seventeen》等都勁煲過這個本地作！

型爆裝潢
■全店帶有點點Vintage氣息，再加上一盞搶眼的水晶吊燈，頓添貴氣。

■店舖多驚喜裝修，例如這個飾物櫥窗，原身是蛋糕櫥櫃。

■中央的木枱放了MichaelJacksonFeel的套裝，還有各大有關其品牌介紹的雜誌報道。

■不但有韓星擁躉，原來型仔日籍球星中田英壽都有份撐場。

■凹入L形建築設計再加勁Raw灰色水泥外層，令整座「天上天下」立於街中也不太顯眼。

產品推介

格仔拼貼款孖襟絨褸$3,262，闊腳絨褲$1,302（左）；軍褸款孖襟絨褸$2,562，洗水牛仔褲$1,232，紮染圍巾$392（右）。

■每件衫褲都車上自家布製的「GeneralIdea」Label。

■伸脷Logo雙面冷帽，Logo一面夠大另一面就夠多，$392。

二樓：
地道火鍋超級辣

香港闊太置地Shopping完會去半島HighTea，今次就可以喺地下瘋狂購物後即上二樓火鍋店擦番餐！這間韓式地道火鍋店地方不太大，全店只有十多張枱左右，所以感覺尤其溫暖，食物選擇方面貴精不貴多，不過他們的火鍋對香港人來說屬勁辣級別，各位唔好辣的朋友記住要事前同老闆單聲喎！唔記得？都唔緊要，有自助咖啡機任斟任飲，筆者發覺原來飲咖啡都解得吓辣。

■很多韓人喜歡一大班Friend到此烚吓烚吓再啤一啤，特別熱鬧。

■海鮮火鍋，同行韓國朋友都話辣，好堅，一人份量$60。

■韓式炸三寶，包括炸魷魚、炸蝦同炸餃子，夠新鮮鬆脆，$70。

四樓：
PCBAR打機直落

食飽想打機？又得！四樓PCBar提供上網及打機服務，布置簡單整齊乾淨，而且收費便宜（首小時$10.5，第二小時$8.4，之後每小時$4.9），又有小食售賣，直落幾粒鐘玩到餓都有得醫肚，夠晒方便。

■平日較清閒，逢周末就人頭湧湧，要早啲霸位。

■多種PCGame任玩，筆者最欣賞他們的護頸大班椅，舒服到唔捨得走！

■提供食物主要是零食口痕最啱，全部幾蚊雞有交易。

天上天下

地址：407-21,Seokyu-dong,Mapo-gu,Seuol,Korea
交通：乘地鐵2號線於弘大入口站落車，轉乘的士（約$14）即達。
營業時間：11:00am至11:00pm
備註：以上售價已折算為港幣，兌換率1,000韓圜=$7。