拉素喺前晚場意甲聯同萊切鬥得燦爛，但如果唔係佢哋球員之間有心病，話唔定可以反敗為勝。
喺半場落後兩粒嘅拉素，憑迪肯尼奧兩個入球，迫和萊切三比三。其實，迪肯尼奧有機會大演帽子戲法或者食鋪大四喜，只可惜佢隊友S恩沙基阻佢發達，幾次無交波畀佢，兼且唔肯讓位置比較好嘅佢接應文費甸尼嘅妙傳。
記得喺第一輪聯賽作客贏森多利亞一比○上，迪肯尼奧曾經搶咗S恩沙基個十二碼去射，重做埋贏波功臣，唔通S恩沙基記仇記到𠵱家？
拉素實力大不如前，𠵱家排喺中下游位置，喺未來嘅日子分分鐘要打護級。佢哋既然搭得呢條船，就好應該通力合作，盡全力幫球隊爭取好成績，唔應該將啲私人恩怨帶到球場。
香港人要「心繫家國」，新任英冠球隊狼隊領隊荷杜就「心繫熱刺」！呢位前英格蘭國家隊領隊透露，有位商人欲收購熱刺，如果事成佢就可以再返去呢間倫敦球會執教，雖然熱刺否認其事。我求大俠真係佩服荷杜對熱刺嗰種鍥而不捨嘅決心，但都係帶好啲狼隊先算啦。
史浩克04宣布雲達不來梅中場安斯會喺明夏加盟，重同佢哋簽約五年；由於安斯季尾回復自由身，所以史浩克唔使畀轉會費。史浩克之前從不來梅免費撬走卡斯達積同艾列頓，𠵱家連安斯都簽埋，令不來梅唔見咗成一千萬歐元，唔怪得德國傳媒話不來梅同史浩克有仇啦！
前晚英超聯曼城主場對熱刺，主隊前鋒安歷卡下半場後備入替，點知換嚟主場球迷噓聲！通常連球迷都唔歡迎你，無論係球員抑或領隊，喺球會都會前途似「咁」；無計啦，鬼叫你安歷卡最近扭計，話想轉投更大球會發展，咁即係話曼城係細會，啲球迷唔打你都算好彩喇。
晨曦喺噚日場聯賽盃大勝後，球員刻意攞牌洗底，咁嘅行為，真係幫唔落。雖然你可以話巨星如碧咸都試過專登攞黃牌，但人哋就攞得好有技術，唔講出嚟，根本冇人會知。但晨曦噚日一次掟界外球，居然刻意拖延時間，做到兩個人攞黃牌，咁嘅伎倆真蠢！難怪惡評如潮。
逢周一至周五見報