八方上周喺新報四十五周年報慶酒會見到新城電台行政總裁甘國亮，問佢當日有冇去霑叔嘅追思大會，點知佢阿哥講咗一番做人大道理畀八方聽，佢話人死咗，就乜都唔重要，如果自己有朝一日唔喺度，大家千祈唔好搞咁多嘢，佢相信霑叔同佢一樣咁諗法，只係其他人唔理死者生前點諗，要追思你，你都冇佢辦法。甘仔重特別話好多謝霑叔當新城開娛樂台時幫佢打頭陣，大清早開咪，搶咗唔少的士大佬嘅聽眾。
講開新城，佢哋同《信報》今日喺香格里拉酒店，舉行一個名為「香港經濟峰會2005」嘅活動，主辦單位都好有飛士，請到唐唐、任總、李業廣、周文耀、施永青、陳啟宗以及梁兆基出席，題目離唔開如何吸引外資、如何推動香港銀行業以及香港地產市道等。唐唐梗係政治正確，本來講題係「如何進一步拓展中港兩地經貿合作領域」，最後改成講「香港經濟前景和明年財政預算案」；而任總就講內地與香港嘅資金融通。
傳真︰2623-9278
電郵︰