開始寫稿的時候收到台灣來的消息，華仔在金馬獎奪得最佳男主角。真係覺得好開心，一直都覺得華仔在「無間道3」內的演出很精采，上一屆香港電影金像獎沒有提名「無間道3」內劉建明的角色自己也覺得有點遺憾，最後華仔也憑「大隻佬」內的角色得獎。現在金馬獎榮登影帝可以說是替「無間道」整個系列內兩個最重要的角色寫下完美結局。
演戲從來都唔係一件容易的事，如果要深入研究可能係幾痛苦。舉個例子，你去探討一個學問，會計又好，法律又好，始終有個範圍喺裏面，你要應用嘅工具可以喺範圍內找，最後都係講你點去運用範圍內的知識解決問題。
演戲嘅範圍係乜嘢？大家想像一下，你要去演一個角色，個角色係人，角色本身可以創作一個完整嘅成長歷史背景，呢個背景會組織成角色嘅性格，性格決定咗角色嘅行為，面對抉擇時嘅反應，行路嘅姿勢，見錢會唔會開眼等等，所有嘢都係要配合這個範圍內分析進行。你唯一可以用嘅工具就係你自己，因為係由你去演出。所以你要打磨好你嘅工具，包括聲線的運用，提高型體動作的可塑性，增強情緒上的控制，如果你重有時間嘅，可以研究埋自己邊個角度好睇啲，最好做埋護膚。
嘩！有冇講得複雜啲呀！如果你認真去研究係要咁㗎。有人會問：「導演，我個角色係行出嚟三步就中槍死喎。」學術層面嚟睇你都要由佢嘅成長歷史背景裏面搵出個原因，點解佢明知出面開緊槍重要行出去。所以真係好難㗎！華仔偉仔真係勁㗎！