活力猩猩：「西九龍文娛藝術區足足有40多公頃土地，面積有兩個尖沙嘴咁大，我哋係志在必得的！」
痕痕地：「我家族有200幾億，我私人又有200幾億，show你hand都得啊，怕你哋有牙？」
太太鼓：「唉，淨係起個天幕都要成50幾億，我冇你哋咁無聊陪阿曾生玩。都唔知點解阿曾生咁鍾意天幕，佢係唔係中咗天幕情意結呢？我pass，唔玩嘞。」
痕痕地：「哈……活力猩猩，你不如擔心吓你哋起成四十層樓高的巨型天幕，會唔會好似溫室咁，焗熱人啊！哈哈！」活力猩猩：「你同我定，天幕不是密封，是靠十九支傘形的建築物支撐，而且我哋搵咗專家計算長廊的風洞，我哋的設計是可令天幕內達至冬暖夏涼，夏季天幕區有風同會噴灑水珠，天幕氣溫比外面低攝氏四度，到冬天則可比外面高四度！」
痕痕地：「吓……呢個係文娛藝術區，唔係地產項目……」活力猩猩：「你同我定，我哋嘅設計係，文娛區內有3個一共3000幾個座位嘅劇院，而且我哋已經同喺倫敦擁有13間劇院的RUG達成獨家協議提供節目，死未？」痕痕地：「我哋夠已經同多間中外著名藝術館，包括遼寧省博物館、法國奧塞及居美兩大博物館商討合作。將來，有大把『國寶』來港展覽，你哋要pass嘞啩？」
活力猩猩：「Pass？你講笑！我哋已經同古根海姆博物館結盟，現時古根海姆分別在美國、意大利、西班牙、德國營運5間博物館，每年吸引300萬人次，是全球最龐大的文化機構之一啊。」
痕痕地：「吓……我哋……」活力猩猩：「而且我哋重會夥拍溫哥華科學世界計劃，在西九建兒童互動博物館㖭。」痕痕地：「咦，你起兒童互動博物館做乜？」活力猩猩：「我點知啊！咁你知唔知遼寧省博物館有乜出名展品吖？」痕痕地：「你儍㗎，問我？……話時話，你估今次可以值幾錢呎呢？」活力猩猩：「冇兩萬都有萬五啦……」