鱷魚恤（122）上年業績見血，聖誕自由行，捧場客冇着落，今年聖誕鐘，應該一洗頹風。鱷魚恤11月中公布04年度（7月止）業績，由03年勁蝕5876萬元，轉為大賺4454萬元，PE得5.5倍。當然，市場就成衣股，所肯付出品牌溢價，一如買衫睇牌子，大家質地一樣，但價錢可以差天共地。所以，話鱷魚恤可以追上龍頭思捷（330）、堡獅龍（592）及佐丹奴（709），上25倍PE水位，等如冇講嘢。
但要咁睇，俾市場有相近「觀感」嘅金利來（533），PE都15倍，鱷魚恤要追上金利來，講緊要升1.7倍。又就當鱷魚恤05年純利只得單位數增長，預期PE都係得5倍，點計，現價都係好殘。
星期四之前，係收集鱷魚恤良機，皆因星期四領匯（2382）一上市，無論短炒或者想長揸者，但見呢期氣候立立亂，索性做埋短炒友嘅套利回籠，市場又有水到，聖誕自由行，股仔有機再來過，鱷魚恤街貨市值，得1億銀碼，要辣起，容乜易。
莊士機構（367）明日公布05年度（3月止）中期業績。只講兩點，莊士阿仔莊中（298）最新中期純利升20%，莊中冇乜大問題，莊士本身又控有唔少優質收租項目，照計，莊士最新中期，亦可以靚靚仔仔。第二，莊士每股資產值1.87元，現價折讓63%，最新中期有機會為旗下物業作資產重估，若然有升值，資產折讓唔止講緊呢個水位。個市唔再倒水，照計莊士可以短線走一轉。
錢雋