本地搖滾班霸Beyond入行以來歷盡娛圈高低潮，對於時下娛圈毒潮氾濫，作為年輕偶像的周永恆、吳浩康和陳見飛先後因藏毒被捕，敢言的Beyond不禁痛斥這幾位藝人污染娛圈，更指對待吸毒藝人應任其繼續做癮君子，直至他們在娛圈中自然消失。
現今樂壇備受盜版、水貨及非法下載歌曲衝擊，唱片業直滑谷底，幕後良才買少見少、歌星又咪嘴表演，三位年輕藝人周永恆、吳浩康及陳見飛更因藏毒被捕。日前Beyond在中環接受本報訪問時，提到時下藝人吸毒成災，三子即痛斥這些藝人污染娛圈。
黃家強先一口氣說：「毒品係最離譜，身為娛樂圈中人，成日同毒品拉上關係，唔只影響自己前途，重會影響音樂大圍嘅睇法。娛樂圈已經唔係好環境，污染得咁緊要，嗰幾個人有好大責任，如果啲人睇到佢哋嘅偶像搞成咁會點？上一代嘅歌手有實力，為音樂而做音樂，個個健健康康；𠵱家個個吔吔烏，紙醉金迷，感覺好快搵到錢，好快識享受，一發達就吸毒，唔知變成點咁，連鎖反應好明顯，都唔係為音樂做好嘢嘅，抹煞晒做音樂嘅人一番經營。前輩啲嘅歌手好似學友、阿倫，個個積極唱歌，以前邊有歌手吸毒㗎？」
吳浩康當初上庭，其律師指做藝人壓力大才會染上毒癮，黃貫中（Paul）即不屑說：「幾條𡃁仔有幾大壓力呀？唔好賴減壓，寧願硬硬淨淨，話爽呀，我重欣賞你。」
葉世榮則說：「佢哋得嚟嘅嘢太易，唔珍惜，壞人就有機可乘。」Paul又說：「換個角度睇，傳媒應該唔好講佢哋呢啲，直情唔好提，發生呢啲事之後，等佢哋自己消失，有藝人有呢啲嘢，上庭咪由佢上庭囉，玩消失啦，唔好理佢吸毒，由佢哋做癮君子，都唔成氣候。等佢哋日吸夜吸，冇晒前途。」世榮也附和道：「寫得多係反宣傳嚟㗎。」
問Beyond曾否遇上毒品引誘時，Paul即說：「喺音樂圈唔係冇，我見到有咁嘅人，但最初玩音樂唔覺得有壓力，唔覺得咁樣（吸毒）會增加靈感，只知攞住結他係咁彈，係都唔食。」世榮更搞笑地說：「我個年代冇𠵱家咁複雜，只有白粉咋喎。」家強笑道：「即係道友，驚㗎，流晒鼻涕同周身病，喺度左典右典。」Paul哈哈笑道：「好貴㗎。」
現時娛樂事業滑落谷底，極之慘情，Beyond三子異口同聲表示首要是政府帶頭推廣。Paul說：「政府要帶頭，政府有責任，有冇意圖令香港文化音樂提升，政府做嘢勝過我哋嗌啦，例如起好啲文娛設施，搞好啲。」
世榮聞言即反問Paul：「唔係起緊咩？」Paul馬上笑道：「起樓就有，變晒質。原先政府話起西九龍（西九龍文娛藝術區），聽到好開心呀，最後變晒啦。政府應該搞多啲文娛活動，啲人至會有品味。」世榮亦認同Paul的說法說：「大球場應該畀搞演唱會，唔好被小撮人破壞咁好嘅地方。」
Paul又說：「香港冇正統嘅音樂訓練中心，想學音樂都唔知去邊度，有正統嘅音樂學院，師資優良啲，有課題嘅，啲學生嘅水準都會高啲。」
近期影圈設立緊急應變小組與政府共議救市對策，本地唱片業陷入低潮多時，未知Beyond會否考慮做召集人向政府反映難題？Paul說：「我哋係一分子，話唔到事，好難影響，要大家一齊，要政府幫手。」這時家強插嘴說：「但政府攞幾千萬搞維港巨星匯呀。」Paul便說：「個個有份畀錢㗎，搵啲唔識搞嘅人嚟搞，唔識搞就搵Beyond搞啦。我好想撼RollingStone㗎，唔好等啲鬼佬過嚟當我哋係阿燦。」
服裝：ClubX─LCX（葉世榮）
場地：Bling
髮型：Roy（Headquarters）
化妝：Hetty（黃貫中＆葉世榮）、AndyLeung（黃家強）
採訪：朱倬誼
攝影：林德雄
