的士司機：真係倒楣
「發酒癲」偷車　非常乘客炒車被捕

【本報訊】「一上車佢就發酒癲嘈喧巴閉，又話我揸得快又話我揸得慢，令我冇辦法安全開車，驚佢到咗大埔大元邨發癲唔肯畀錢，咪車去警署求助先囉，點知一時大意冇攞走車匙，結果俾佢偷咗架車重撞埋，真係倒楣！」一名「非常乘客」昨凌晨在九龍灣乘的士往大埔途中，在車上大吵大鬧，司機無計可施將車駛到馬鞍山警署求助時，男子趁機將的士偷走，駛至三百米外失事撞欄翻車受傷被捕。　記者：陸文超、伍浦鋒

涉嫌酒後偷車失事受傷的非常乘客姓陳（二十五歲），被揭發目前仍在停牌期間，送院後驗出身體酒精含量超出標準近四倍，涉嫌「偷車」、「停牌期間駕駛」、「酒後駕駛」及「無購買第三者保險」等四項罪名被拘捕。
前晚十一時許，姓陳男子與兩名男性友人，在九龍灣啟業邨啟樂街熟食中心消夜飲至滿身酒氣後，由兩名友人攙扶下獨自登上一輛的士返回大埔大元邨住所。

「一路揸車一路驚」
「佢好大酒氣，喺車上一時語無倫次大吵大鬧，一時又話我揸得快，我揸慢啲佢又話我揸得慢，煩到我根本唔可以專心揸車。」自覺倒楣遇上非常乘客的司機姓唐（六十五歲），任職夜更的士司機多年。
「我一路揸車一路驚，九龍灣到大埔係支『大旗』，車費唔少，萬一去到大元邨佢發酒癲唔肯畀錢咁點算，決定搵警察幫手先。」的士駛至沙田近吐露港公路時，姓唐司機將的士駛至最近的馬鞍山警署求助。

報案忘記拔走車匙
「我停架的士喺報案室門口，熄咗引擎但忘記拔走車匙，自己走入報案室求助。點知轉頭同警員走出嚟時唔見咗部車，跟住有個行家走埋嚟同我講，話我架車喺附近撞翻咗！」
事主與警員趕至三百米外錦英苑對開錦英路時，發現的士在一處行人過路線失事撞欄翻側，姓陳乘客頸部受輕傷被困車內，須消防員到場救出送院治療，警方懷疑有人乘司機進入警署後，將的士偷走，結果撞車失事受傷。