2000年諾貝爾文學獎得主高行健蜚聲國際，中文大學圖書館特別為佢設立展館，邀請高行健捐出多件手稿、文具同藏書喺中大展出。
身在法國嘅高行健，噚日透過長途電話向嚟到香港會場嘅人士稱，因為高血壓血管有毛病，早前動過手術，醫生唔畀佢長途旅行，故此只能透過長途電話講話。佢話以前身在內地時，圖書館無疑收藏好多書籍，但因種種原因唔對外開放，因此中大今次搵佢捐出作品手稿等珍藏，佢就非常支持。
高行健近來忙於為下月公演嘅歌劇《八月雪》做準備工作，稍後亦會參與拍攝電影事宜，可見呢位諾獎得主創作力仍然非常旺盛。有份促成高行健捐出珍藏嘅中大繙譯系教授方梓動話，高行健對呢個展覽非常熱心，一口應承之餘重親自挑選展品，兼且自己拎珍藏去郵局寄嚟香港，認真唔話得。方教授形容高行健作品係「冷的文學」，即係唔為市場同政治服務，專注搞純文學創作，堅持自己嘅理念，難怪享譽文壇。
高行健捐贈展由即日起至本月十五日於中大圖書館一樓舉行，歡迎市民參觀，每日二時半及三時有導賞團，查詢可致電26098740。
傳真︰2623-9278
電郵︰
