上年金馬獎，劉德華僅以一票之差，輸畀梁朝偉而飲恨金馬獎，前後三次入到圍而攞唔到獎。到今年應邀出席第41屆金馬獎前（第四次），劉華已信心十足咁，未選已當自己贏咗。最特別係《龍鳳鬥》反常地提早推出DVD，《無間道》Boxset又無故延期，好似預知佢會攞獎，今個星期雙碟齊出賀佢攞金馬獎。
記者：徐影龍
嚴格嚟講，所謂嘅龍、鳳根本冇得鬥，劉華全場控制晒大局，Sammi招架方法只係「讓我一次都唔得！」戲內亦欠缺精心策劃嘅偷呃拐騙布局，若抱住當年張國榮嗰套《龍鳳智多星》心態嚟睇，肯定會失望。綜觀網友好壞參半嘅反應，當劇情片睇會失望，當笑片睇重弊，同行女友最後居然喊到收唔到掣！
《龍鳳鬥》根本係一套徹頭徹尾嘅愛情片。遠赴意大利取景，大量高尚玩意，目的係營造一種浪漫感，再講劉華為咗Sammi，點樣無限付出。有錢生活、靚人靚景再加個悲劇結果，活脫脫就係一套商業版亦舒電影，拖友睇肯定啱Feel！最佳螢幕情侶今勻第三度合作拍愛情片，兩者默契之高，喺戲內濃濃滲透出嚟，兩人交流自然，小動作互相呼應得天衣無縫，難怪劉華自豪咁講：「當今影壇，好難搵到另一組合啱拍呢套戲。」
製作特輯見默契
BounsDisc分開另一隻碟，本以為內容會幾豐富，可惜都係例牌貨色，冇乜驚喜。除咗預告片、相片集外，值得一睇只有導演、演員專訪；好睇地方，係杜琪峯、劉華同Sammi呢個「影壇鐵三角」組合，合拍度高成點，三者間嘅互相信任，令影片流露出一種「真」嘅感覺，第一次合作肯定唔會有呢種成果。
從製作特輯中見到，拍攝現場中，兩主角跟導演試戲時，都係好輕鬆咁傾偈，唔會話埋頭苦幹咁咪對白同夾戲，Sammi攬住華仔喊嗰幕，唔使點傾就令導演收貨。
8碟無間「睇」
雖然套《無間道》終極珍藏版，比原定計劃足足遲咗成個月先派街，不過親身感受過終極珍藏版嘅包裝同內容，的確值得一等再等。豪華式包裝已達先聲奪人嘅氣勢，大大個紙盒入住另一個半透明大膠盒，入面有齊《無間道》三部曲連製作特輯8隻DVD外，重有本超過100頁嘅特集。硬皮封面再包個膠套，甚有收藏價值，入面輯錄咗主要角色嘅硬照同素描畫，重精選幾幕經典場面嘅對白。可一邊睇一邊回味番戲內劇情。
最冧Fans嘅，就係預定終極珍藏版，可刻上自定語句喺座枱嘅銅牌之上（只限預訂客戶）。據發行商報料，最多人預訂的刻名，同今次金馬獎結果無獨有偶地，都係以劉華（或劉建明）最多，至於梁朝偉（或陳永仁）就只係差個馬鼻！未睇內容，淨睇包裝，已經感到誠意爆燈，絕非乘勢呃錢之作，比之前《Matrix》Boxset好得多。
5小時版一氣呵成
總數達8隻DVD嘅終極珍藏版，頭6隻分別係三部曲＋BounsDisc，內容基本上跟之前獨立發售嘅版本一模一樣，不過音效格式就由原本嘅dts升級DTS-ES。另外最特別係最尾兩隻DVD收錄嘅《無間道Trilogy》，將三部曲按戲內時間，重新再剪輯一次，基本上以《無間道II》播先，之後到《終極無間》有梁朝偉嘅部份，最後以第一集＋《終極無間》後半部份作結尾。全長5小時，之前好多人都話睇極唔明，今次可一氣呵成順住時序睇晒三部曲。戲味係少咗，不過對影片可了解不少。
除重新剪輯嘅「順時間」版本外，少不免作點畫面修復；筆者比較過新舊版嘅畫面，基本上好難察覺有乜分別，唔似《Matrix》Boxset咁Tune過晒啲色。睇番BounsDisc先知，原來主要係執走鏡頭及菲林上出現過嘅塵埃，唔係放大咁多倍真係唔多覺，可見製作珍藏版嘅單位，幾咁細心呀。
DVDPro
查詢電話：23326326
