恒生銀行高層人事變動，鄭海泉榮升滙豐亞太區主席，行政總裁一職由滙豐總經理柯清輝接替，副行政總裁陸觀豪退休，由柯清輝嘅滙豐下屬潘仲賢接替。有報紙評論話恒生勢將全面「滙豐化」。
恒生是否全面滙豐化，將來先至知，但陸觀豪退休，就充份顯示恒生創辦人嘅舊勢力，全面淡出，以後再有冇咁多人情味呢？機會似乎少於五成。
老恒生（真係好鬼老，二十八年前已經離職他投）對陸觀豪退休，有感而發，佢話：「既然滙豐全面接管，利爵士嘅親戚退休，可能係知所進退啫，冇乜特別。唉，當年我年少氣盛，貪出面人工高好多，一於跳槽，𠵱家睇番轉頭，得不償失，退休金少咗好多。依恒生舊制（已取消咗，舊人繼續有），陸觀豪嘅退休金應該係服務年資（三十年）乘二點七五乘最後一個月薪金，我唔知陸生有幾多薪水，當佢三十萬一個月啦，有少冇多，三十萬乘三十年乘二點七五等於幾多？」㩒吓計算機，等於二千四百七十五萬，幾好喎。
老恒生話：「嗱，攞二千五百萬退休，幾爽，假如我留在恒生，做咗三十五年，以我嘅級數，點都有十幾萬一個月，算十五萬啦，用方程式一計，退休金應有千四萬，夠享夠長咯，每做多一年，就多幾十萬退休金。呢個制度，係鼓勵啲職員長期留響度，唔好跳槽，所以恒生特別多老臣子。最老襯嗰個可能係我，做咗幾年就自動請辭。」
年少氣盛，容易轉工，今日嘅年輕人吸收父執輩嘅教訓，轉工時不妨諗清楚。不過今日嘅公司福利已經唔算優厚，間間都削，又好難預測三十年之後嘅事嘅。老恒生三十年前如果有一個水晶球，睇通睇透，佢點都唔會受人誘惑，幾大都留番響恒生也！