喺銀行加入競爭之下，今年保險業競爭相當激烈，因此到年尾，好多保險公司都會慶功，慰勞班夥計。李澤楷旗下嘅盈科保險今年生意非常好，所以噚晚特別包咗海洋公園成個場館，等啲經紀帶同家人朋友去玩個痛快。
八方收到風，盈保派出咗接近一千五百張飛，噚日出席嘅人，除咗可以瘋狂玩過山車等機動遊戲，公司重會有頒獎，表揚做得好嘅同事，而保單超過七萬蚊嘅員工，每人一封利是，至於裏面有幾多，八方就唔知喇。
盈保主席袁天凡，因為太太出咗埠而隻身赴會。佢致辭話希望明年好過今年，原來今年佢哋預算生意額有八千萬，埋單發覺超額七成八，去到億四。生意咁好，唔怪得公司咁捨得啦。
傳真︰2623-9278
電郵︰