近年LCDTV發展迅速，由畫質、耐用程度到屏幕尺寸，都屢破極限，當中要數市場最熱賣者，肯定非SHARP嘅AQUOS系列莫屬。日本SHARP前日就喺大阪搞咗個發布會，安排香港傳媒實地採訪，除咗有快將抵港嘅45"型號外，發布會上重即場擺咗部從未曝光嘅65"型號出嚟，畫面靚爆唔在講，部機重足足有半個人咁高！
記者、攝影：張一豪
協力：徐影龍
獨家邀請香港傳媒
今次個發布會專為香港傳媒而設，總數邀請咗8間傳媒去到大阪採訪，而非一般國際性發布會嘅做法，算係非常之少見，亦睇到SHARP對香港市場信心同重視。發布會最矚目產品，係首次曝光、全球最大尺寸嘅65"AQUOS。就現場所見，65"咁大LCDTV，真係相當之壯觀，機身足足有半個成年人咁高！而畫質亦係AQUOS一向畀到人信心嘅保證，就算做到65"咁大，顏色表達及動態反應都好好，而且包含總數622萬個色點，即係一張600萬像素嘅數碼相，每一個Pixel都可毫不遺漏咁顯示番出嚟，解像度超高，就算播放HDTV，都可完美重現。
最可惜嘅係，為顧及耗電、耐用度等問題，65"型號開發成本仍然非常高昂，街價會跟同尺寸Plasma相差頗大，市場未必可消化，而SHARP希望能盡快解決成本問題，喺05年推出65"AQUOS。
有能力製造130"AQUOS
喺完成品當中，65"已屬目前市場最大尺寸，估唔到SHARP更爆出驚人消息，據第一技術部長西原通陽所講，SHARP已有能力開發及製造130"型號嘅AQUOS！呢個數字認真驚人，差不多等於地板上到天花板咁高！雖然SHARP未有回覆130"AQUOS有幾天價，不過據香港影音專家推斷，做咁大，難度已經相當高，重要掛正高質素AQUOS牌頭，造價可能接近50萬港元！除非有辦法將兩塊65"Panel合二為一，又唔會減低AQUOS質素，否則好難會推出市面。
講番現實啲嘅產品，同場中重有款即將到港嘅45"AQUOS，比賣緊嘅42"型號稍大，解像度達到1,920×1,080，比其他同級機更高。雖然到港型號將抽走最新嘅HDMI高解像插頭，不過以目前欠缺周邊裝置對應HDMI，尚算無傷大雅。
原大Panel曝光
除咗睇大大部嘅AQUOS外，SHARP重安排咗香港傳媒，參觀三重縣龜山市嘅總生產線，呢間超巨大廠房主要生產26"以上AQUOS為主，嚟緊會重點生產45"型號。當中最大開眼界者，就係親身目睹原大液晶Panel嘅真面目！須知所有LCD，都係經由一塊巨大嘅原版MotherGlass，按所需而切割出唔同尺寸嘅Panel，而非獨立開發出嚟，而喺面前高過筆者嗰塊，就足可分割出六塊37"型號需要嘅Panel，可想而知幾壯觀！
行家勁讚
