美國女歌手BritneySpears早前多次俾人影到佢赤腳去公廁同埋公然挖鼻，大家可想而知佢嘅衞生意識認真差。最近Britney搭飛機嗰陣，因為佢雙腳發出異味而俾機上面四五個乘客投訴，呢單嘢令Britney𤓓到差啲要搵窿捐。
據英國《太陽報》報道，Britney日前由洛杉磯飛去紐約，一上到機就除咗對鞋俾雙腳唞吓氣，點知就出咗事，原來Britney雙腳臭到離奇，機上面嘅人個個臭到暈咁滯。
一個乘客投訴話：「佢對腳真係臭到冤，首先係有個女人投訴，之後三四個乘客跟住向空姐投訴，個空姐當時好尷尬咁叫Britney着番對鞋，好在Britney都好合作，當時佢塊面都紅晒，佢話隻鞋焗到佢雙腳咁臭喎！」
其實喺呢單嘢之前，Britney星期二喺賭城夜蒲嗰陣亦鬧出笑話，話說當晚佢同老公KevinFederline喺著名日本餐廳Nobu度狂飲清酒，點知走嗰陣腳步浮浮，重差啲仆落地，只係佢個發言人就話：「Britney當晚唔係飲醉，不過佢近日減肥減得犀利咗，腳步咪有啲唔穩囉！」