中原同美聯齊齊進軍濠江代理市場，為咗刺激士氣，都同香港一樣，搞個每月業績大賽，美聯話十一月由一個入行半個月嘅新人黃佩詩攞到冠軍，佢主要係靠一單大手成交攞獎。
美聯區域經理楊朗明表示，黃佩詩負責住宅買賣，但係佢個客想買件舖，於是轉介畀其他分行同事跟進，結果合作成功，個客用千七萬買咗板樟堂區一個地舖，令到黃佩詩攞到十一月最佳營業員獎。
美聯𠵱家喺澳門共有五間分行，前線代理近一百人。
另外，攞到十一月最多宗數獎嘅營業員，就係梁偉業。
租金上漲，衍生另類租務市場，就係將單位間多個房用嚟出租，好似返到六、七十年代嘅《七十二家房客》形式。
屯門康麗花園二座低層G單位，面積四百八十六呎，業主間成四個房，每個月租千零蚊，最後一個房間剛以一千三百五十蚊租出，不過間房面積得六十呎，計落要成二十二個半一呎，高過好多市區新樓。以屋苑平均呎價千四蚊計，單位市值七十萬，若四間房以呢個價錢租出，回報有成九厘幾，認真唔錯。
聽屯門地膽祥益地產講，租期一般半年，但業主要睇過租客入息證明至肯租。不過租客要留意，呢啲唔係套房，廚廁係公用㗎！
灣仔屬舊區，大部份係單幢住宅，交投唔活躍，但係喺船街嘅頂旺大廈，就一個禮拜有七宗成交，平均每日一宗，勝過唔少大屋苑。
點解呢幢住宅咁旺，原來係因為附近有重建項目，加上呎價只係三千零蚊，所以連投資者都入市，交投自然活躍啦！
頂旺大廈落成僅五年，美聯區域經理蔡俊雄話，高層B室，面積五百五十四方呎，投資者睇樓一日就即刻入市，成交價二百一十五萬，呎價三千九百五十二蚊。
另一個低層B單位，都係由投資者承接，成交價一百八十五萬，呎價三千四，呢位屯門投資者重快手，睇樓一粒鐘就扑槌。
屯門區住宅銀碼細，所以吸引唔少投資者買嚟收租或者短炒。區內一名長線投資者，最近成功以一百二十八萬，沽出手上嘅邁亞美海灣四座中層六九五呎D單位，呎價千八蚊，比起同類單位兩千蚊呎平近一成，但兩年唔夠都賺成三十萬，升值三成一，利潤都算豐厚。
呢個投資者跟手就換馬，用八十四萬買入啟豐園（圖三）三座高層C室，面積四百六十七呎，呎價只係千八蚊，計劃將單位裝修後重新包裝出售。祥益潘鈺恒預計該單位可以賣貴一成至一成半。
電郵地址：
