新上市的天虹紡織（2678），上市首日已經破底，噚日表現就更加肉酸，再跌17.86％，收0.92元，成交股數3871萬股，金額3763萬元。
經紀黃話，早前人人炒新股都搵到食，連帶所謂機構投資者都抱住同一心態，諗住要貨在首日沽出獲利，點知天虹首日表現不濟，有投資者見勢色唔對，嗱嗱臨沽清貨，所以場面先至咁難睇。
不過經紀黃話天虹表現咁差，唔等於紡織股冇得諗，棉花價格回落幅度唔細，及明年取消紡織配額皆利好紡織股。
好似福田實業（420）同埋德永佳（321）兩隻紡織孖寶，將在下周四及下周五公布業績，分析員估計福田盈利會跌，德永佳盈利會升，但兩隻都買得過，皆因憧憬兩股前景秀麗。
福田昨日微升1.85％，收5.50元，成交股數260萬股，金額1429萬元。至於德永佳則跌1.99％，收7.40元，成交金額1433.8萬元。
慕容小初