紅灣半島又拆又唔拆事件，終於為董團夥拆咗第一個炸彈，等元旦遊行少咗一個「官商勾結」嘅課題。孫明揚出名老謀深算，佢當然手上有王牌，加上群情洶湧，阿爺可能出埋手，最後先至以「穩定」兩字壓倒啲愛錢亦愛面嘅地產商，自動收回拆樓決定。
孫鬍子施渾身解數，危城十二日，有驚無險。剩係諗吓啲小學生日日圍住紅灣遊行，環保人士突然掃場，已經好冇癮。到真正拆樓之時，長毛阿牛一個唔該死不肯走，變成國際大新聞，純官頂得住，虔誠嘅郭氏三兄弟都頂唔順，做人要見好就收，千祈唔好貪得無厭。
紅灣叫停，下一場好戲到煲呔親自披甲上陣。八方聽聞，負責公關嘅大員已經勒令佢阿哥不准發火（純官亦收到同樣指示），所以煲呔噚日扮輕鬆，同佢一手提拔嘅曾俊華一齊落區，去咗大埔巡視，體察吓民情喎。
對煲呔同地產商嚟講，西九先至大件事，下周四個模型展會係重頭，希望可以扭轉民意，唔使衰收尾，起唔成個文娛藝術中心，至於班尊貴議員都係睇民意做頭嘅啫。
講開尊貴議員，佢哋噚日喺內會討論，應唔應該繼續搞議員記者同樂日，卿姐、長毛同陳智思都反對。卿姐話，好後悔舊年同樂日有份扮演「女子十二樂坊」，睇返啲報道影嘅相（李華明同飛天朱扮女人），真係令人啼笑皆非。
長毛就話，要搞就應該與民同樂，「同記者有乜好搞？」陳智思話，啲議員識同記者打關係啦，毋須多此一舉，最後決定將年年搞同樂日改為四年一次。
（圖）煲呔（左二）同鬍鬚曾（左）一齊落區，算係為西九炸彈紓緩吓氣氛。
政府新聞處提供圖片
傳真︰2623-9278
電郵︰