賭王何鴻燊愛女何超瓊前夫許晉亨，感情生活一向多采多姿，究竟佢平時放工冇約人時鍾意去邊？
馮仁昭前日下午放工嘅時候，就喺中環明星髮廊Headquarters撞見許公子，佢西裝骨骨咁嚟到，髮廊即刻安排佢喺私家房休息，許公子喺等候時重叫外賣醫吓肚，馮仁昭以為佢食完嘢會等髮型師幫佢剪番個靚髮，點知原來許公子呢次上嚟嘅目的竟然係修甲。馮仁昭最初睇到都唔敢相信，原來許公子真係好注重自己身體任何一部份嘅儀容，難怪佢成日都keep得咁好，身邊吸引咁多穿花蝴蝶。
許公子搵咗個女修甲師幫佢修甲，佢似乎都幾enjoy修甲嘅過程，不過佢不停咁講手提電話，唔知係咪等陣修完甲，即刻約班朋友去威呢？
許公子偶然都會約番舊愛劉嘉玲出嚟敍舊，馮仁昭都想八吓佢哋會唔會分享一吓美甲心得。
原子鏸同陳鍵鋒等人，噚日喺尖沙嘴出席一個寫實福音電影《天地孩兒》嘅記者會，原子鏸聽到故事主人翁講嘅故事重感動到眼濕濕。陳鍵鋒就話：「之前拍外景，見到有個棄嬰，覺得𠵱家啲人咁樣，真係要傳遞一啲正確嘅訊息畀佢哋。」
歐陽震華（Bobby）噚日喺將軍澳電視廣播城為明年三月開拍嘅新劇《施公奇案》試造型，佢着咗套官服，又話套劇會同陳浩民同埋郭可盈合作。
歐陽震華遲啲會去內地拍劇，所以《施公奇案》嘅監製就勸佢喺內地嘅時候，要小心飲食，控制體重，費事到時肥咗，啲戲服唔啱身。
曹敏莉噚日喺銅鑼灣擔任「全新Sonata新聞發布酒會」司儀，佢着咗條私伙靚裙，掛住條珍珠頸鏈出場，即時搶晒鏡。佢話近排拍劇多咗，講多咗對白，所以口齒伶俐咗唔少。另外，曹敏莉話下周六安排咗個影迷聚會，去答謝佢哋嘅支持。
薛芷倫前晚攞完十大傑出衣着人士獎項後，話已經同馬清偉辦妥離婚手續，之後佢返咗半山寓所，換過套夜蒲戰衣，約埋寇鴻萍夫婦同埋設計師鄭紹良等成班朋友一齊去蘭桂坊蒲吧，慶祝四十一歲生日，唔知薛芷倫會唔會順便慶祝埋做番單身貴族呢？
董敏莉（Monie）最近有一首新歌《我問我》裏面嘅歌詞，原來其中一句係節錄自已故填詞人黃霑嘅作品《問我》裏面嘅「問我歡呼聲有幾多」。
而𠵱家拍緊劇嘅Monie，對於有指薛凱琪拍劇嚟換獎，佢話：「早知我自薦喺東華食炭啦！其實無綫有咁多騷，冇理由為獎而做嘢。」
朱茵噚日喺將軍澳電視廣播城接受《香港直播》訪問時，話佢近排送咗一張自己嘅新唱片畀校長譚詠麟，阿倫就鼓勵佢要堅持出唱片，朱茵即刻應承佢，重話一定會練好啲歌，到第時可以唱現場咁話喎。
