特區政府為西九龍、紅灣半島煩到一頭煙之際，爆單鍾麗幗事件，向議員輸送彈藥，增加政府不必要嘅麻煩，啲司長局長為之暈得一陣陣。聽一位未係高官（亦唔肯升上高官位，怕要出鏡俾議員質）嘅中高層公僕L講：「呢鋪杰嘞，我有好多老友排緊隊退休，唔少已遞紙向王永平申請退休後轉往私人機構任職。自鍾麗幗事件爆發之後，公務員事務局放軟晒手腳，全部申請都hold住。鍾小姐呢次累街坊，所有舊同僚無不怨聲載道。」
話鍾小姐係惹火尤物，並不誇張，李兆基七十幾歲咯，喺記者招待會上仍然有火。王永平、孫明揚等人有火，曾蔭權被佢殃及池魚，當然唔會冇火！公僕L自己已經下晒火，話明做咗公僕三十年無謂臨退休衰收尾，一於逢事唱慢板，不做不錯，徹底摒棄「目標為本」，高喊程序萬歲。
公僕T話：「丁山呀丁山，如果孫明揚同地產商扯皮，出售紅灣半島一事，一於拖得就拖，拖到今年，就乜事都冇啦，最多咪打官司，用納稅人嘅錢去打之嘛。如果曾司長同樣採取拖字訣，好，你哋文化界咁多反對聲音，擺低佢多三年先啦，由下屆特首決定，咪又耳根清淨！孫公、曾司長咁勇，重俾人懷疑利益輸送，為競選第三屆特首造勢㖭！」
為官自保之道，就係唔做嘢，無謂強出頭。譬如兩電加價之議，下個星期就出籠，你估葉澍堃會唔會玩拖字訣，或者將個波踢畀立法會呢？按經濟推理，今年油價、煤價、運煤船運費全部急升，為咗控制、降低電廠噴出廢氣嘅污染量，兩電投資咗好幾十億元，按照利潤管制協議，兩電有權加價，可能基本電費要加，燃料費要加，兩者合計恐怕要加一成或以上。以今日嘅政治氣候，葉澍堃局長如何處理呀？到佢上台表演嘞，大家準備學嘢！