張張報紙大大版講領匯（2382）事件，下周一聆訊覆核唔知結果係點，人心點會好，恒指成份股再減值335億元，紅籌國企加埋又再蒸發167億元。個市跌，唔可以完全「賴」晒啲攪X棍，但點都同佢哋有啲關係。
中企P輪4540：國企指數散2%，跌幅大過其他指數。中企P輪9886、2189與2173，打入威水榜頭3位，升幅30%至56%，但加埋金額都係33萬，冇乜人喺呢3隻輪上賺到錢。炒家比較集中喺4540，有59球易手，收12.4仙，升14%。隻輪明年3月到期，溢價4.0%，槓桿率9.5倍（有效5.9倍），引伸波幅29.2%。隻輪溢價唔算吸引，當然如果認為國企會大散嘅則睇法唔同。數據靚嘅係2173，明年1月尾到期，輪價7.3仙，溢價得1.1%，槓桿率13.1倍（有效10倍），引伸波幅22.2%，但成交金額得4萬幾，知道隻輪數據靚都冇用。
和黃C輪9663：和黃C輪9663成交金額1.39億元，收23.9仙，跌22%，跌幅係正股（013）跌幅嘅16倍。隻輪明年2月中到期，溢價7.9%，槓桿率29.2倍（有效11.6倍），引伸波幅29.7%。溢價唔算低，壽命唔算長。和黃若再跌，博反彈，呢隻唔係咁理想，揀2291、4438、3514等較實際。
國壽C輪2143：國壽C輪2143周三升20%，昨日則大散46%。國壽（2628）跌0.30元，隻輪走晒樣。隻輪已屆末日，本月28日最後買賣，到期前，正股上落0.10元計，隻輪升跌26%，繼續飛沙走石，喺隻輪上落注嘅，要有心理準備大贏大輸。
章盛